Համակարգային կերպով պետք է վերանայենք մեր սղոցը՝ ԱԺ կանոնակարգ օրենքը․ Համազասպ Դանիելյան. ՏԵՍԱՆՅՈՒԹ

Ազգային ժողովը քննարկում է «Ազգային ժողովի կանոնակարգ» սահմանադրական օրենքում փոփոխություններ և լրացումներ կատարելու մասին և կից ներկայացրած նախագծերի փաթեթը։

Ըստ նախագծի հիմնավորման՝ այս փոփոխությունների համաձայն՝ մշտական հանձնաժողովի նախագահը յուրաքանչյուր հերթական նստաշրջանի վերջին, հերթական նիստի օրակարգային հարցերը սպառվելուց հետո, ամփոփ հաշվետվություն է ներկայացնելու Ազգային ժողովին և հանրությանը՝ ելնելով թափանցիկության և հաշվետվողականության սկզբունքներից, ինչը, իր հերթին, նպաստելու է հանձնաժողովի աշխատանքային արդյունավետության բարձրացմանը, իսկ հանձնաժողովի նիստերին ոլորտի մասնագետներ հրավիրելուց առաջ հանձնաժողովի անդամներին տեղեկացնելու գաղափարը միտված է քննարկման արդյունավետության բարձրացմանը:

Ներկա իրավակարգավորումների շրջանակում մշտական հանձնաժողովը կարող է որոշում կայացնել ընդհուպ երկու պատգամավորի կողմ քվեարկելու արդյունքում, ինչը խնդրահարույց է: Նախագծով առաջարկվում է նիստն իրավազոր համարել միայն հանձնաժողովի անդամների առնվազն կեսից ավելի անդամների՝ նիստին ներկա գտնվելու դեպքում, ինչը կնպաստի առավել քննարկված և հիմնավոր որոշումների կայացմանը։

«Իմ քայլը» խմբակցության պատգամավոր Համազասպ Դանիելյանն առաջարկվող փոփոխությունների վերաբերյալ ելույթը սկսեց առակով։

«Մի պատմություն կա փայտահատների մասին, որոնք փորձում են ծառ կտրե,լ և անցորդը, տեսնելով այդ երկուսի ժրաջան աշխատանքը, ասում է՝ ձեր սղոցը կարծես թե սուր չի։ Ասում են՝ հա, բայց մենք էնքան ծառ ունենք կտրելու, սղոցը սրելու ժամանակ չունենք»,- նշեց պատգամավորը՝ ընդգծելով, որ համակարգային կերպով պետք է վերանայել «սղոցը»՝ ԱԺ կանոնակարգ օրենքը, որտեղ համակարգային բացթողումներ կան։

Մանրամասները՝ տեսանյութում։