Մանե Գևորգյանը՝ վարչապետի աշխատակազմին թեստավորելու մասին

Վարչապետի աշխատակազմում մեկուսացվածներ չկան: Այս մասին Factor.am-ի հարցին ի պատասխան ասաց վարչապետի խոսնակ Մանե Գևորգյանը. «Այս պահին չունենք մեկուսացված աշխատակիցներ, թեստավորումը կկատարվի, եթե լինի բժշկի համապատասխան ցուցումը: Այս պահին ցուցում չունենք, երբ լինի՝ կթեստավորվենք»:

Հարցին՝ վարչապետի հետ շփումը բավարար չէ՞, որ թեստավորում իրականացնեն, Մանե Գևորգյանը պատասխանեց. «Վարչապետի հետ բոլոր շփումները տեղի են ունեցել պահպանելով անվտանգության կանոնները: Կրել ենք դիմակ, ձեռնոց, պահպանել ենք հեռավորությունը: Այնպես չի, որ պարտադիր է, որ մենք էլ վարակված լինենք, բայց եթե առաջանա անհրաժեշտություն, ապա մեզ էլ կթեստավորեն»:

Մանե Գևորգյանն ասաց, որ Նիկոլ Փաշինյանի հետ շփված անձանց շրջանակը հայտնի է․ նրա ընտանիքի անդամներն են, աշխատակազմի որոշ աշխատակիցներ, կառավարության այն անդամները, որոնց հետ եղել են հանդիպումներ: Նիկոլ Փաշինյանը աշխատանքները կիրականացնի հեռավար:

«Ինչ-որ չափով փոխարինումներ կլինեն, բայց հեռավար մասնակցելու է բոլոր քննարկումներին, նիստերին և խորհրդակցություններին, որոնք որ կլինեն»,- ասաց խոսնակը: Նիկոլ Փաշինյանը տանն է մեկուսացված, ըստ Մանե Գևորգյանի, այլ հաստատություն տեղափոխվելու անհրաժեշտություն չկա:

Հիշեցնենք, որ ՀՀ վարչապետ Նիկոլ Փաշինյանն ու նրա ընտանիքի անդամները վարակվել են կորոնավիրուսով: Այս մասին ֆեյսբուքյան ուղիղ եթերի ժամանակ այսօր հայտարարել է վարչապետը:

«Ես կռահում եմ, թե որտեղ և երբ եմ վարակվել: Վարկվել եմ աշխատանքային խորհրդակցությունների ընթացքում: Համոզմունք կա, որ այդ մի դեպքի հետ է կապված: Այդ մատուցողի մոտ ևս կորոնավիրուս հաստատվել է », – ասել էր Փաշինյանը:

Նարեկ Կիրակոսյան