Մշակույթ
20.11.2017 | 15:17
ՀՀ մշակույթի նախարար Արմեն Ամիրյանը ավելի քան մեկ տարի առաջ լրագրողների հետ ճեպազրույցում հայտնել էր, որ հանրապետության թանգարաններում մինչև 2016 թվականի ավարտը նախատեսվում է ներդնել աուդիովիզուալ և վիրտուալ գիդերի համակարգ, որը նախատեսված է հեռախոսների համար: Նրա խոսքով` հավելվածի միջոցով զբոսաշրջիկները հնարավորություն կունենան թանգարաններ և թատերահամերգասրահներ այցելության համար առցանց տոմսեր գնել։
«Հավելվածը կլինի 9 լեզվով, կունենա 3D պատկեր, ինքնանկարի հնարավորություն»,- ասել էր նա՝ հավելելով, որ հավելվածները հնարավորություն կտան զբոսաշրջիկներին ծանուցումներ ուղարկելու`թանգարանների նոր ցուցադրությունների վերաբերյալ:
Factor.am-ը գրավոր հարցմամբ Արմեն Ամիրյանից հետաքրքրվել է՝ ինչ փուլում է աուդիովիզուալ և վիրտուալ գիդերի համակարգի ներդրումը։ Այսպիսով՝ Արմեն Ամիրյանը տեղեկացրել է, որ աուդիովիզուալ գիդերի բջջային հավելվածը ՀՀ-ում Չինաստանի դեսպանատան տրամադրած դրամաշնորհով ստեղծվել և ներդրվել է Սերգեյ Փարաջանովի, Մարտիրոս Սարյանի և Արամ Խաչատրյանի թանգարաններում: «Ծրագիրը շարունակական է, առաջիկա տարիներին հավելվածը կներդրվի Հայաստանի բոլոր պետական թանգարաններում»,- ասված է նախարարի պատասխանում։
Նկատենք, որ մեկ տարի առաջ Արմեն Ամիրյանը համակարգի ներդրումը նախատեսում էր իրականացնել շատ ավելի սուղ ժամկետներում։ Նրա նշած վերջնաժամկետից անցել է մեկ տարի, սակայն համակարգը ներդրվել է հանրապետության ընդամենը երեք թանգարանում։
Ավելին՝ նախարարն իր պատասխանում այս անգամ ավելի զգուշավոր է։ Հայաստանի պետական թանգարաններում հավելվածի ներդրումը նա արդեն նախատեսում է իրականացնել ավելի անորոշ ժամկետում՝ «առաջիկա տարիներին»։
Աննա Բաբաջանյան
