Էդմոն Մարուքյանը դժգոհում է՝ ընդդիմությանը չեն թողնում Սարդարապատ գնալ, վարչապետի խոսնակը հակադարձում է՝ նախապես չեն դիմել

Իշխանության ներկայացուցիչներից զատ այլ քաղաքական ուժեր չեն կարողանում այցելել Սարդարապատի հուշահամալիր՝ Հայաստանի Առաջին Հանրապետության 102-րդ ամյակի առթիվ: Այս մասին տեղեկացնում է Ազգային ժողովի «Լուսավոր Հայաստան» ընդդիմադիր խմբակցության ղեկավար Էդմոն Մարուքյանը:

Նրա պնդմամբ՝ քաղաքական ուժերին հնարավորություն տրված չէ գնալ Սարդարապատի հուշահամալիր և հարգանքի տուրք մատուցել: «Սարդարապատը բաց է միայն իշխող ուժի համար: Քաղաքական այլ ուժեր չեն կարող գոնե 1 ներկայացուցիչ ուղարկել հարգանքի տուրք մատուցելու մեր հերոսներին»,- այս մասին ֆեյսբուքում գրել է ԼՀԿ ղեկավարը:

Factor.am-ի հետ զրույցում Մարուքյանն ասաց, որ իրենք դեռ ապրիլի 24-ին են առաջարկել խորհրդարանական ուժերից մեկական հոգու թույլ տալ հարգանքի տուրք մատուցել պետական միջոցառումների ժամանակ, բայց իշխանությունները նախապես որոշված կարգը չեն փոխել:

«Անցած անգամ մենք փորձել ենք գնալ Մայիսի 9-ի տոնակատարությանը, չեն թողել, դրանից առաջ փորձել ենք գնալ Ցեղասպանության հուշահամալիր՝ էլի չեն թողել, փակ է եղել: Նույն կանոնով փակ է նաև Սարդարապատը, գնանք հասնենք, որ չթողեն ներս գնանք՝ իմաստը ո՞րն է: Արարողակարգով, որ կարողանար ամեն ուժից մեկ հոգի մասնակցել, իրենք կասեին: Անցած անգամ մենք այս հարցը բարձրաձայնել ենք, բայց նույն ձևով շարունակվում է այս վարքը, որն անընդունելի է: Ամեն ուժից մեկ մարդ կարող էր գնալ»,- մեզ հետ զրույցում իր դժգոհությունը հայտնեց պատգամավորը:

Հարցին՝ արդյոք դիմե՞լ են պարետատուն, որպեսզի հուշահամալիրի տարածք մուտք գործելու իրավունք ունենան, ինչպես, օրինակ, Սերժ Սարգսյանը, երբ պարետի որոշմամբ ապրիլի 24-ին այցելել էր Ցեղասպանության զոհերի հուշահամալիր, Մարուքյանն արձագանքեց․ «Սերժ Սարգսյանին որպես նախկին նախագահի են թույլ տվել, ինքը եղել է արարողակարգի մեջ, որը նախապես պլանավորած է եղել: Այսինքն՝ ինքը կարող է մասնակցել, իսկ խորհրդարանական ուժերի ղեկավարները՝ ոչ: Սերժ Սարգսյանին այսօր էլ է թույլ տրված, այսօր էլ կարող է գնալ: Այն կարգը, որն ընդունված է, շարունակում են անել, բան չեն փոխում մեր քննադատություններից հետո: Հիմա մենք փնտրում ենք այլընտրանքային տարբերակ: Մտածում եմ, որ կգնամ Ղարաքիլիսայի ճակատամարտի հուշահամալիր»:

Ընդդիմադիր ուժի ղեկավարի բարձրաձայնած հարցի շուրջ մեկնաբանություն խնդրեցինք վարչապետի Խոսնակ Մանե Գևորգյանից, որը Factor.am-ին փոխանցեց, որ հնարավոր չէ անգամ խորհրդարանական ուժերի մեկական ներկայացուցիչների միջոցառմանը մասնակից դարձնել, քանի որ խուսափում են բազմամարդ հավաքներից: Բացի այդ, ըստ խոսնակի, ընդդիմադիրները չեն դիմել առանձին ժամի հուշահամալիր այցելելու համար:

«Նույնը եղել է ապրիլի 24-ին, մայիսի 9-ին, ընդդիմությունը չի բողոքել այդ ժամանակ: Իրենց համար ընդունելի է եղել, որ մուտքը փակ է, միայն բարձրաստիճան պաշտոնյաների համար է և վերջ: Նույն սկզբունքն է գործում: Մենք փորձում ենք խուսափել մարդաշատ միջոցառումներ անելուց: Ամեն դեպքում իրենք չեն էլ դիմել, հիմա բողոքում են, բայց չեն դիմել, որ այցելեին: Եթե դիմած լինեին, ապա հնարավոր է՝ կազմակերպվեր, որ տարբեր ժամերի գնային»,- մեկնաբանեց Մանե Գևորգյանը:

ԲՀԿ-ից էլ փոխանցեցին, որ առաջիկայում կպարզեն և կասեն՝ արդյոք դիմել են պարետատուն՝ հուշահամալիր այցելելու համար, թե՝ ոչ: Նշենք, որ հանրապետությունում համավարակի տարածումը կանխելու և մարդկային հնարավոր կուտակումներից խուսափելու նպատակով, մայիսի 28-ին կարգելվի տրանսպորտային միջոցների և քաղաքացիների մուտքը Սարդարապատի հուշահամալիր։ Ոստիկանությունից հայտնում են, որ կարգը խախտելը կառաջացնի իրավական հետևանքներ։

Նարեկ Կիրակոսյան