Արսեն Թորոսյանի քննադատ Նարեկ Զեյնալյանը մասնակցում է պարետատան նիստերին. վարչապետը դժգո՞հ է նախարարից

Ազգային ժողովի առողջապահության և սոցիալական հարցերի մշտական հանձնաժողովի նախագահ, «Իմ քայլը» խմբակցության պատգամավոր Նարեկ Զեյնալյանը վերջին շրջանում մասնակցում է արտակարգ դրության պարետատան նիստերին՝ չլինելով պարետատան անդամ:

Նկատի առնելով Նարեկ Զեյնալյանի՝ Արսեն Թորոսյանի նկատմամբ ունեցած բացահայտ քննադատական վերաբերմունքը, նրա՝ նիստերին մասնակցությունը ընկալվել է որպես Արսեն Թորոսյանի աշխատանքից վարչապետի դժգոհության դրսևորում։ Ընդ որում, պարետատան նախավերջին նիստում, ըստ մեր տեղեկությունների, Նիկոլ Փաշինյանը մի քանի անգամ դիտողություն է արել Արսեն Թորոսյանին։

Մասնավորապես, երբ քննարկվել է Հանրապետական հիվանդանոցը ԿՈՎԻԴ 19-ի կենտրոն դարձնելու հարցը, Արսեն Թորոսյանն ասել է, թե դեմ է, քանի որ չի վստահում այդ ԲԿ-ի ղեկավարությանը, ինչին վարչապետն արձագանքել է, թե՝ նախարարը խոսում է իր գործընկերներին չվստահելուց այն դեպքում, երբ իր գործունեության արդյունքում քաղաքացիները սկսել են չվստահել կառավարությանը։

Վարչապետի խոսնակը, սակայն, այս տեղեկությունները չի հաստատում: Նա պնդում է, որ նախարարի և վարչապետի միջև խնդիրներ չկան, և, որպես դրա հաստատում, նշում երեկվա համատեղ ճեպազրույցը։ Իսկ Նարեկ Զեյնալյանի՝ նիստերին մասնակցելու վերաբերյալ Մանե Գևորգյանը պարզաբանեց, որ սա պայմանավորված է այն հանգամանքով, որ պարետատան նիստերն անցկացվում են ընդլայնված կազմով:

Զեյնալյանից զատ մասնակցում են այլ մասնագետներ ևս: Խոսնակը փոխանցեց, որ Նարեկ Զեյնալյանը պարետատան անդամ չի դարձել, պարզապես հրավիրվում է նիստերին:

Հիշեցնենք, որ ԱԺ ոլորտային հանձնաժողովի նախագահ Նարեկ Զեյնալյանի և առողջապահության նախարար Արսեն Թորոսյանի հարաբերությունները լարված են: Նրանք անգամ օրինագծերի շուրջ քննարկումների ժամանակ չեն թաքցնում իրենց վատ հարաբերությունները:

Նարեկ Կիրակոսյան