08.10.2026 | 23:18
Քննարկվել են ՀՀ-ի և Իրանի մաքսային մարմինների միջև նախնական էլեկտրոնային տվյալների փոխանակման համակարգի գործարկման քայլեր
Շիրակի մարզում կորոնավիրուսից առողջացել է 245 հիվանդ․ Գյումրու ինֆեկցիոնում բուժվում են 47-ը
27.05.2020 | 14:35
Մայիսի 27-ի դրությամբ՝ Գյումրու ինֆեկցիոն հիվանդանոցում կորոնավիրուսով 47 հիվանդ է բուժում ստանում, նրանցից 20-ը Շիրակի մարզի բնակիչ է։ Այս մասին տեղեկանում ենք Շիրակի մարզպետարանից։
Կորոնավիրուսից առողջացել և հիվանդանոցից մինչ օրս դուրս է գրվել 245 պացիենտ, որոնցից 167-ը մարզի բնակիչ է։
Մարզպետարանի հրապարակած տվյալների համաձայն՝ հիվանդության արձանագրման առաջին օրից մինչև հիմա Շիրակի մարզի 340 բնակչի մոտ է դրական ախտորոշում եղել, նրանցից 259-ը փաստացի բնակվում է մարզում, 81-ը մարզի գրանցում ունի, սակայն այստեղ չի բնակվում։ 26 հիվանդ բուժվում է մայրաքաղաքում:
Շիրակի մարզում այս պահին տնային ինքնամեկուսացման ցուցում ունի 315 քաղաքացի, նրանցից 18-ի մոտ դրական ախտորոշում կա՝ հիվանդության անախտանիշ ընթացքով, նրանց հսկողությունն իրականացվում է առողջության առաջնային օղակի կողմից։
Մարտի 1-ից մինչ օրս Շիրակի մարզի բուժհաստատություններում և հիվանդությունների վերահսկման և կանխարգելման ազգային կենտրոնի մարզային կենտրոնում իրականացվել է 1․866 նմուշառում, մայիսի 12-ից 26-ը ներառյալ Գյումրիում իրականացվել է 543 նմուշառման հետազոտություն։
Կորոնավիրուսից Շիրակի մարզում գրանցվել է մահվան 9 դեպք։ Նշենք, որ մահվան վերջին երկու դեպքերն արձանագրվել են Երևան տեղափոխված ու այնտեղ բուժվող հիվանդների շրջանում, որոնք եղել են ծանր վիճակում։ Նախորդ դեպքերը գրանցվել էին Անիի տարածաշրջանում ու Գյումրիում։
