06.07.2026 | 11:39
Վարորդական իրավունքի վերականգնման դիմումներ և վկայականների տրամադրման կարգում փոփոխություններ. ՈՒՂԻՂ
Ալեքսանդր Ազարյանին և Տիգրան Փոլադյանին կարգապահական տույժի ենթարկելու միջնորդություն է ներկայացվել ԲԴԽ
Հասարակություն
27.05.2020 | 14:00
Factor.am-ի տեղեկություններով Արդարադատության նախարարությունը դիմել է Բարձրագույն դատական խորհրդին երկու դատավորների՝ Ալեքսանդր Ազարյանի և Տիգրան Փոլադյանի նկատմամբ վարչական վարույթ հարուցելու միջնորդությամբ։
Վերաքննիչ դատարանի դատավոր Ալեքսանդր Ազարյանին վարչական տույժի ենթարկելու միջնորդության պատճառը ՀՔԾ քննիչի հասցեին վիրավորական արտահայտություն հնչեցնելն է։
Հատուկ քննչական ծառայության կոռուպցիոն, կազմակերպված և պաշտոնեական հանցագործությունների քննության վարչության պետի տեղակալ Հրաչյա Մուշեղյանի և դատավորի միջև այդ միջադեպը ծագել էր «5-րդ Ալիքի» սեփականատեր Արմեն Թավադյանի վերաբերյալ քրեական գործի ընթացքում։
Factor.am-ի հետ զրույցում դատավոր ԱզարյանՆ ասաց, որ տեղյակ է պրոցեսից՝ «սովորական գործընթաց է, վարույթ հարուցելու պայմաններում այդպես էլ պետք է լիներ»։ Իսկ դատավոր Տիգրան Փոլադյանի նկատմամբ վարչական վարույթ հարուցելու պատճառը եղել է իր վարույթում գտնվող մի գործ, որը նա երկար ժամանակ չի քննել։
Նշենք, որ Տիգրան Փոլադյանը ՀՀ դատական դեպարտամենտի ղեկավար Կարեն Փոլադյանի եղբայրն է։ 10.08.2018թ-ից նախագահի որոշմամբ նշանակվել է Սնանկության դատարանի դատավոր: Հավելենք, որ դատավոր Փոլադյանը մեր զանգերին չպատասխանեց։
Արդարադատության նախարարությունից դատավորների նկատմամբ վարույթ հարուցելու մջնոդրություն ստանալու վերաբերյալ մեր տեղեկությունը հաստատեցին նաև ԲԴԽ-ից։
Լիլիթ Շաբոյան
