Անփոխարինելի մարդիկ ընդհանրապես չկան, բայց հանրապետության նախագահը հսկայական փորձառություն ունի. Աղվան Վարդանյան

Կառավարության գործունեության արդյունքում կան նկատելի դրական փոփոխություններ: Factor.am-ի հետ զրույցում համոզմունք հայտնեց Ազգային ժողովի ՀՅԴ խմբակցության քարտուղար Աղվան Վարդանյանը:

«Առաջինը՝ ստվերային տնտեսությունը կրճատելու դրական միտումներն են, երկրորդ՝ առնվազն վերին մակարդակում նկատելի են կոռուպցիայի դեմ ինստիտուցիոնալ պայքարի իսկապես որոշակի հաջողություններ: Բացի այդ, հիմք է դրվել կոռուպցիայի դեմ պայքարի անկախ, ինքնավար մարմնի ձևավորման, որը տարիների մեր պահանջ-ցանկությունն էր: Նկատելի է հարկային և մաքսային մարմինների թափանցիկ և լավ աշխատանքը, ստուգումների կտրուկ կրճատումը նրանց կողմից, ինչից տևական ժամանակ բողոքում էին տնտեսվարողները»,- թվարկելով Կարեն Կարապետյանի ղեկավարած կառավարության ձեռքբերումներն՝ ասաց ՀՀԿ-ի կոալիցիոն գործընկերոջ՝ ՀՅԴ խմբակցության պատգամավորը:

Factor.am-ի հիշեցմանը, որ այս օրերին «Առինջ մոլ»-ի առևտրականները հենց հարկային մարմինների աշխատանքից են դժգոհում՝ դրանք որակելով «տեռոր», Աղվան Վարդանյանը պատասխանեց. «Ես կարծում եմ՝ երեկ վարչապետը հստակ պատասխանեց այդ հարցերին, մնացածը շահարկումների դաշտում են: Եթե իրենք գործում են այսօրվա օրենսդրության պայմաններում և թաքցնելու բան չունեն, ապա խնդիր չեն ունենա: Տեռորի մասին խոսելը բացարձակապես անտեղին է, ընդամենը կատարվում է հաշվառում՝ իրական պատկերը ցույց տալու նպատակով: Եթե մարդիկ գործում են իրական պատկերով, խնդիր չեն ունենա»:

Մեր հստակեցնող հարցին՝ այսինքն՝ առևտրականները հարկերից խուսափելու նպատակ են հետապնդում, ՀՅԴ-ական պատգամավորը պատասխանեց. «Թույլ չտալ հաշվառում իրականացնել, ՀԴՄ կտրոններ չտրամադրելը ուրիշ ի՞նչ նպատակ կարող է ունենալ»:

Հանրապետական կուսակցության անդամները պնդում են, որ 2018 թվականի բյուջեն կայուն զարգացման հիմքեր է ապահովելու: Աղվան Վարդանյանից հետաքրքրվեցինք՝ ինչո՞ւ մինչ այս այդ հիմքերը չեն ստեղծվել, չէ՞ որ ՀՀԿ-ն նոր չի իշխանությունը ստանձնել, ՀՅԴ-ական պատգմավորը պատասխանեց. «Հանրապետականների փոխարեն ես չեմ պատասխանի: Մենք այսօր կոալիցիոն գործընկերներ ենք, և այս կառավարության ծրագիրը մեր ընդհանուր ծրագիրն է: Եթե մենք անընդհատ անցյալով խոսենք, ոչ մի տեղ չենք հասնի»:

Մանրամասները՝ տեսանյութում:

Շողիկ Գալստյան