30.04.2026 | 01:05
Չեմպիոնների լիգա․ «Աթլետիկոն» ու «Արսենալը» չպարզեցին հաղթողին․ ՏԵՍԱՆՅՈՒԹ
Քաջարանի միջադեպի 3 մասնակցի դատարանն ազատ է արձակել․ Քննչական կոմիտե
Հասարակություն
25.05.2020 | 20:42
Երեկ Կապանի ոստիկանության կողմից ձերբակալված երեք անձինք՝ Լևոն Համբարձումյանը, Մարատ Ստեփանյանը և Խորեն Միրզոյանն այսօր դատարանի որոշմամբ ազատ են արձակվել։ Այս մասին Factor.am-ը տեղեկացավ Քննչական կոմիտեից։
Դատարանը ոչ իրավաչափ է համարել նրանց անազատության մեջ պահելու նախաքննական մարմնի միջնորդությունը։ Դեռևս պարզված չէ Երևանում ձերբակալված չորրորդ անձի՝ Աշոտ Պապյանի վերաբերյալ դատարանի որոշումը։ Նրա մասով ևս նախաքննական մարմինը կալանավորելու միջնորդություն է ներկայացրել դատարան։
Քննչական կոմիտեից Factor.am-ին հայտնեցին՝ դեռևս հայտնի չէ միջնորդության ճակատագիրը։
Հիշեցնենք, երեկ Քննչական կոմիտեն տեղեկություններ էր հայտնել շաբաթներ առաջ Քաջարանում այս անձանց մասնակցությամբ միջադեպից։ Ըստ ՔԿ-ի՝ նախաքննության ընթացքում պարզվել է, որ Քաջարանի բնակիչներ Գ․ Մ․-ի և նրա ընկերոջ՝ Կ․ Թ․-ի միջև տեղի ունեցած վեճի հանգամանքների պարզաբանման համար Քաջարան համայնքի ղեկավարի կանչով, 2020թ. ապրիլի 26-ին՝ ժամը 20:00-ի սահմաններում, Քաջարանի Լեռնագործների փողոցում գտնվող, վերջինիս պատկանող բենզալցակայանի հետնամասում գտնվող չգործող նախկին ռեստորանի շինությունում հավաքվել են համայնքի ղեկավարը և շուրջ 20 հոգի, որտեղ տեղի է ունեցել ծեծկռտուք։
«2020թ. ապրիլի 29-ին՝ ժամը 13:30-ի սահմաններում, Զանգեզուրի պղնձամոլիբդենային կոմբինատի աշխատակիցներ Բ․ Հ․-ն, նրա եղբայրը՝ Լ․ Հ․-ն, Խ․ Մ․-ն և Մ․ Ս․-ն, կոմբինատի ավտոկայանատեղիում բռնություն գործադրելով, առևանգել են Շ. Մ․-ին և Խ.Մ․-ի կողմից վարվող ավտոմեքենայով տեղափոխել «Աժդանակ» ՍՊԸ-ի տարածք, Ա․ Հ․-ի և Գ․ Մ․-ի հետ ծեծի ենթարկել նրան: Շուրջ կես ժամ ծեծելուց հետո, Շ. Մ․-ին « Տոյոտ ա-Պրադո» մակնիշի ավտոմեքենայով տեղափոխել են Ագարակ բնակավայրում գտնվող, Ա․Պ․-ին պատկանող առանձնատուն, որտեղ կրկին ծեծել են նրան, ինչին միջամտել են Շ.Մ․-ի եղբայրը՝ Գ.Մ․-ն և Ա․Փ․-ն, ինչպես նաև ինքնությունները չպարզված անձինք, ինչի հետևանքով ծեծկռտուքը դադարել է: Քրեական գործի նախաքննության ընթացքում, Ա․Պ․-ի բնակության վայրում կատարված խուզարկությամբ հայտնաբերվել է առանձնապես խոշոր չափի «մարիխուանա» տեսակի թմրամիջոց։ 2020թ․մայիսի 24-ին Խ․ Մ-ն, Մ․ Ս-ն և Լ․ Հ-ն ձերբակալվել են` ՀՀ քրեական օրենսգրքի 131-րդ հոդվածի 2-րդ մասի 1-ին կետով, իսկ Ա․Պ-ն՝ ՀՀ քրեական օրենսգրքի 268-րդ հոդվածի 3-րդ մասով նախատեսված հանցագործություններ կատարելու կասկածանքով։ Իրականացվում են մեծածավալ քննչական գործողություններ և օպերատիվ միջոցառումներ՝ համայնքի ղեկավարի մասնակցությունը դեպքերին ստուգելու և նրա դերակատարումը պարզելու ուղղությամբ: Նախաքննությունը շարունակվում է»,- հայտնել է Քննչական կոմիտեն։
Ռոբերտ Անանյան
