05.04.2026 | 15:19
Վթարային ջրանջատում Երևանում և Արմավիրում
2 կազմակերպությունների կողմից փաստաթղթերի կեղծման միջոցով պետական գնումներին մասնակցելու վերաբերյալ նյութերն ուղարկվել են ոստիկանություն
Հասարակություն
20.05.2020 | 18:33
2 կազմակերպությունների կողմից բանկային երաշխիքների թերթիկները կեղծելու միջոցով պետական գնումներին մասնակցելու վերաբերյալ տեղեկությունները Երևանի քաղաքապետարանը փոխանցել է ՀՀ Գլխավոր դատախազությանը։ Այս մասին Factor.am-ի հետ զրույցում տեղեկացրեց Գլխավոր դատախազության հանրային կապերի բաժնի պետ Արևիկ Խաչատրյանը։
Նշենք, որ այս կազմակերպությունների մասին հրապարակում էր արել նաև Երևանի ավագանու «Լույս» խմբակցության ղեկավար Դավիթ Խաժակյանը՝ ընդգծելով, որ խոսքը հարյուրավոր միլիոնների չարաշահման մասին է։
«Դավիթ Խաժակյանի հրապարակմանը մենք ընթացք ենք տվել, Երևանի դատախազությունն այն ուղարկել է Ոստիկանության բաժին՝ նյութեր պատրաստելու։ Երևանի քաղաքապետարանի գրությունը նույն խնդրի առնչությամբ կցվել է և ուղարկվել Ոստիկանություն»,- նշեց Արևիկ Խաչատյանը։
Ոստիկանությունից էլ մեզ հայտնեցին, որ Դատախազությունից առայժմ հրապարակման վերաբերյալ որևէ գործ չեն ստացել։
Հիշեցնենք նաև, որ ըստ ավագանու անդամ Դավիթ Խաժակյանի՝ այդ կազմակերպություններից մեկի ղեկավարը՝ Վահագն Ղալումյանը, ՀՀ վարչապետ Նիկոլ Փաշինյանի կնքահայր, Իջևանի քաղաքապետի պաշտոնակատար Հայկ Ղալումյանի ազգականն է։ Տեղեկությունը փորձեցինք ճշտել Հայկ Ղալումյանից։ Նա չպատասխանեց մեր հարցին՝ խոստանալով ավելի ուշ զանգահարել:
Անժելա Պողոսյան
