17.09.2026 | 21:13
Փաշինյանի գլխավորությամբ քննարկվել է TRIPP նախագծի իրագործման ընթացքը
Արգիշտի Քյարամյանի ընկերը նշանակվել է ԱԱԾ քննչական դեպարտամենտի պետ
Քաղաքականություն
19.05.2020 | 15:34
Ազգային անվտանգության ծառայության քննչական դեպարտամենտի պետի պաշտոնին նշանակվել է Արթուր Պողոսյանը: Նրա նշանակման մասին տեղեկությունը Factor.am-ի հետ զրույցում հաստատեցին ԱԱԾ մամուլի կենտրոնից:
Արթուր Պողոսյանը նախկինում զբաղեցնում էր Շիրակի դատախազի տեղակալի պաշտոնը: Նա հանդիսանում է ԱԱԾ տնօրենի նորանշանակ տեղակալ Արգիշտի Քյարամյանի ընկերը։
Factor.am-ն այս սպասվող նշանակման մասին գրել էր դեռ մաիսի 13-ին: Արթուր Պողոսյանը մեզ հետ զրույցում այդ օրը ոչ հերքել, ոչ էլ հաստատել էր տեղեկությունը:
Փաստորեն Արգիշտի Քյարամյանը շարունակում է իր մտերիմներին պաշտոնների տեղավորելու գործելաոճը։
Մենք դեռ նախորդ տարի գրել էինք, որ նա իր սանիկին՝ Արթուր Նահապետյանին, որը կրկին Շիրակում դատախազի տեղակալ է եղել, ՊՎԾ-ում պաշտոնի է նշանակել:
Այս տեղեկությունը, ի դեպ, Քյարամյանը չէր հերքել:
Ի դեպ, այսօր գրել էինք, որ քննչական դեպարտամենտի արդեն նախկին պետ Արթուր Աղաջանյանը աշխատանքից ազատվելու դիմում գրել է մայիսի 5-ին։ Սա այն նույն օրն է, երբ Արգիշտի Քյարամյանը նշանակվել է ԱԱԾ տնօրենի տեղակալ։
Նարեկ Կիրակոսյան
