Շառլ Ազնավուրի ընտանիքը կողմ է «Զվարթնոց» օդանավակայանը մեծանուն երաժշտի անվամբ կոչելուն

ՀՀ Հանրային խորհուրդը հայտարարություն է տարածել, համաձայն որի՝ Զվարթնոց օդանավակայանը Շառլ Ազնավուրի անվամբ անվանակոչելու հարցի վերաբերյալ կարծիք հայտնելու համար ՀՀ Կառավարությունը դիմել է ՀՀ Հանրային խորհրդին։

Հանրային խորհուրդը ֆեյսբուքյան իր էջում տեղադրել է առաջարկությունը և հայտնել, որ թեպետ խորհրդի բոլոր անդամներին ուղարկվել է ՀՀ կառավարությունից ստացված փաթեթը, ոչ պակաս կարևոր է նաև հանրության տեսակետը՝ գոնե սոցիալական ցանցերի օգնությամբ։ «Ուրախ կլինենք ձեր դիտարկումներն ու կարծիքներն ստանալ այս հարցի կապակցությամբ»,- ասված է ՀԽ հայտարարության մեջ։

Հայտարարությանը կից հրապարակված փաստաթղթերից հայտնի է դառնում, որ հարցի շուրջ իր դիրքորոշումն է հայտնել նաև Շառլ Ազնավուրի ընտանիքը, մասնավորապես՝ մեծանուն երաժշտի որդի Նիկոլա Ազնավուրը: 2020 թվականի հունվարի 16-ին մակագրված փաստաթղթում Նիկոլա Ազնավուրը, դիմելով Հայաստանի վարչապետ Նիկոլ Փաշինյանին, գրել է․ «Ուսումնասիրելով լրատվամիջոցների հրապարակումները, քննարկումներն ու այլ հայտարարություններ հարցի շուրջ, մեզ համար պարզ դարձավ, որ մարդիկ շատ դրական են վերաբերվում անվանափոխությանը, բայց նաև ունեն նաև համակրանք և մեծ կապվածություն «Զվարթնոց» անվան հետ։ Այդ իսկ պատճառով կարծում ենք, որ լավագույն տարբերակը կարող է լինել օդանավակայանը կոչել «Շառլ Ազնավուրի անվան Զվարթնոց միջազգային օդանավակայան»։ Աշխարհում նման ձևաչափով անվանակոչման բազում օրինակներ կան, մասնավորապես՝ Փարիզի Շառլ դը Գոլը, Վարշավայի Ֆրեդերիկ Շոպեն օդանավակայանը և այլն։ Սույն նամակով ցանկանում եմ հայտնել մեր պատրաստակամությունն ու աջակցությունը Զվարթնոց օդանավակայանի անվանմանը Շառլ Ազնավուրի անունն ավելացնելու նախաձեռնությանը։ Մենք վստահ ենք, որ նոր անունն էլ ավելի մեծ միջազգային հետաքրքրություն կբերի Հայաստանին՝ օգնելով աշխարհում Հայաստանի առաջխաղացմանը։ Անհրաժեշտության դեպքում ուրախ կլինեմ հանդիպել Ձեզ հետ և քննարկել մանրամասները մարտի 2-ից հետո՝ Հայաստան վերադառնալուն պես»։