Հասարակություն
15.05.2020 | 17:39
Իտալացի մասնագետները հետազոտել են երեխաների մոտ նոր բորբոքային համախտանիշի առաջացման դեպքերը և ենթադրել, որ այն փոխադարձ կապ ունի SARS-CoV-2 վիրուսի հետ: Այս մասին գրում է DW-ի ռուսական ծառայությունը:
Գիտնականները պարզել են, որ կորոնավիրուսի համաճարակից ամենաշատը տուժած իտալական Բերգամոյի հիվանդանոցի մանկաբուժության բաժանմունքում փետրվարից ապրիլ 10 երեխայի մոտ սուր բորբոքային համախտանիշ է ախտորոշվել, որը նման է հազվադեպ հանդիպող Կավասակիի հիվանդության հետ: Հետազոտության արդյունքները հրապարակվել են The Lancet հեղինակավոր բժշկական ամսագրում:
Հետազոտության հեղինակները փաստել են, որ նոր խորհրդավոր հիվանդությամբ հոսպիտալացված երեխաների թիվը սովորականից 30 անգամ ավելին է. հիվանդանոցում Կավասակիի համախտանիշի մեկ դեպք գրանցվում է միջինը երեք ամիսը մեկ անգամ: Սրա հիման վրա գիտնականները ենթադրել են, որ COVID-19 կորոնավիրուսի համաճարակը կարող էր Կավասակիի հիվանդության ծանր տեսակի տարածման մակարդակի աճի պատճառ դառնալ, ինչպես նաև զգուշացրել կորոնավիրուսի համաճարակի զոհ դարձած երկրներում նման բռնկման հնարավորության մասին:
Կավասակիի հիվանդությունը հիմնականում ախտորոշվում է նորածինների և մինչև 5 տարեկան երեխաների մոտ, իսկ նոր վտանգավոր համախտանիշը հանդիպում է նաև ավելի բարձր տարիքի երեխաների մոտ: Այն ուղեկցվում է բարձր ջերմությամբ, ցանով, այտուցներով, մաշկը, աչքերը, սիրտն ու անոթները խոցող բորբոքումով:
Երեխաների մոտ նման ախտանշաններով հիվանդացության դեպքեր են արձանագրվել Եվրոպայում և ԱՄՆ-ում, որոշ դեպքերում՝ մահվան ելքով: Լոնդոնի հիվանդանոցներից մեկում մայիսի 13-ին բորբոքային համախտանիշից 14-ամյա տղա է մահացել, որը քրոնիկ հիվանդություններ չի ունեցել: Բրիտանական լրատվամիջոցների փոխանցմամբ՝ ներկայում երկրում նման ախտանշաններով մինչև 100 երեխա է հոսպիտալացվել:
ԱՄՆ-ում այս հիվանդությունն ի հայտ է եկել կորոնավիրուսի համաճարակի բռնկումից մեկ ամիս անց: Միայն Նյու Յորքում ավելի քան 100 դեպք է արձանագրվել: Հիվանդության հետևանքով բարդացումներն առնվազն 3 երեխայի կյանք են խլել:
Իտալացի հետազոտողներն ընդգծում են, որ Կավասակիի հիվանդությանը նմանվող բորբոքային համախտանիշը հազվադեպ է հանդիպում և խոցում է կորոնավիրուսով վարակված 1.000 երեխայից մեկին: Նրանց կարծիքով՝ մեծ է հավանականւթյունը, որ այս հիվանդությունը վարակի հանդեպ իմունային արձագանքի արդյունք է:
