12.12.2024 | 12:34
Ջրագիծ, մանկապարտեզ է կառուցվում, էդ գյուղի տների արժեքն աճում է. Փաշինյան․ ՏԵՍԱՆՅՈՒԹ
Քննիչի գործողություններին գնահատական տալու նպատակով նշանակվել է ծառայողական քննություն
Հասարակություն
14.05.2020 | 22:36
Քաղաքացու կողմից հիշատակված քննիչի գործողություններին գնահատական տալու նպատակով, ՀՀ քննչական կոմիտեի նախագահի հրամանով, նշանակվել է ծառայողական քննություն։ Այս մասին տեղեկացրին ՀՀ քննչական կոմիտեի տեղեկատվության և հասարակայնության հետ կապերի բաժնից։
«Նելլի Միքայելյանի hաղորդման հիման վրա՝ նախնական համաձայնությամբ, Երևան քաղաքի Մալաթիա-Սեբաստիա համայնքում գտնվող բնակարանի՝ Ն.Միքայելյանի ժառանգության մասնաբաժինը խարդախությամբ հափշտակելու դեպքի առթիվ ՀՀ քննչական կոմիտեի Երևան քաղաքի քննչական վարչության ծանր հանցագործությունների քննության բաժնում քննվում է քրեական գործ՝ ՀՀ քրեական օրենսգրքի 325-րդ հոդվածի (փաստաթղթեր, դրոշմներ, կնիքներ, ձևաթղթեր, տրանսպորտային միջոցների հաշվառման համարանիշներ կեղծելը, իրացնելը կամ օգտագործելը) 1-ին մասով և 178-րդ հոդվածի (խարդախությունը) 3-րդ մասի 1-ին կետով:
Հիշյալ քրեական գործով Նելլի Միքայելյանը ճանաչվել է տուժող:
Քրեական գործով էական նշանակություն ունեցող մի շարք հանգամանքներ պարզելու նպատակով 2020թ. մարտի 9-ին նշանակվել է դատափաստաթղթաբանական և դատաձեռագրաբանական համալիր կրկնակի փորձաքննություն, որի եզրակացությունը դեռևս չի ստացվել:
Վերը նշված փորձաքննության եզրակացությունն ստանալուց հետո քրեական գործով կկայացվի համապատասխան դատավարական որոշում:
Միաժամանակ տեղեկացնում ենք, որ 2020թ. մայիսի 14-ին Նելլի Միքայելյանի կողմից լրագրողներին տրված հարցազրույցում հիշատակված ՀՀ քննչական կոմիտեի Երևան քաղաքի քննչական վարչության քննիչի գործողություններին գնահատական տալու նպատակով, ՀՀ քննչական կոմիտեի նախագահի հրամանով, նշանակվել է ծառայողական քննություն»,- նշված է հաղորդագրության մեջ:
