Քաղաքականություն
12.05.2020 | 19:38Factor.am-ի զրուցակիցը կինոռեժիսոր Էդգար Բաղդասարյանն է: Նա անդրադարձել է հայաստանյան ներքաղաքական ամենաքննարկվող թեմաներին:
-Պարո՛ն Բաղդասարյան, արդեն մի քանի օր է՝ բուռն կերպով քննարկվում է Սասուն Միքայելյան-Էդմոն Մարուքյան փոխհրաձգությունն ու ծեծկռտուքը՝ խորհրդարանում, երկուստեք հնչած սպառնալիքներն ու քրեական ենթամշակույթին բնորոշ դրսևորումները: Մի կողմ թողնելով անձնական համակրանքը կամ հակակրանքը, կողքից դիտելով կատարվողը, ի՞նչ կարծիք կազմեցիք մեր իշխանության և մեր ընդդիմության մասին:
-Մեր պառլամենտը որակական առումով շատ վատն է: Մենք համոզվեցինք, որ շատ վտանգավոր բան է, երբ խորհրդարանում գերակշռող մեծամասնություն է մեկ խմբակցությունը, անկախ այն բանից՝ որի մասին է խոսքը: Նաև ուզում եմ հասկանալ՝ որոշ մարդիկ ինչ գործ ունեն խորհրդարանում, ինչ ֆունկցիա են կատարում: Ազգային ժողովում մարդիկ կան, որոնք գարեջրի շշի ֆունկցիա են կատարում: Ամբողջ ազգը «Ֆեյսբուք»-ում քննարկում է, թե ով ում ինչ ասաց, ինչ հայհոյեց… Այս ու՞ր եք իջեցրել քաղաքական դիսկուրսի մակարդակը: Ձեր քննարկումներում բովանդակային զրույց կա՞ ընդհանրապես: Ինչպե՞ս կարելի է պաշտոնն օգտագործել այն բանի համար, որ բացատրեք՝ ով ում է խփել, ինչի համար…Դրա համար կա փողոց. փողոց դուրս եկեք, իրար ծեծեք…
-Մերժելով նախորդ իշխանությանը՝ հեղափոխության ջատագովներն ու ներկայիս իշխանությանը քվե տված քաղաքացիներն ակնկալել են տեսնել նաև նախորդ համակարգում առկա արատավոր երևույթների մերժում, բայց, ինչպես տեսնում ենք, անցումը նոր արժեքային համակարգին դեռևս տեղի չի ունեցել, ինչո՞ւ:
-Ես հին իշխանություններին մերժողներից եմ, մերժել եմ 20 տարի, և դա բովանդակային մերժում էր՝ մշակութային, ինտելեկտուալ, գեղագիտական…Ծեծկռտուք աշխարհի գրեթե բոլոր խորհրդարաններում եղել է, բայց ուրիշ բան է՝ ինչի վերաբերյալ են եղել այդ վեճերը: Անկեղծ ասած, այնպես չէ, որ ես մեր խորհրդարանից հիասթափված եմ, որովհետև երբևէ հիացած չեմ էլ եղել, բայց ես կարծում եմ, որ մեզ ուրիշ պառլամենտ է պետք, այն պետք է ցրվի և նորը հավաքվի: Մեր պառլամենտից պետք է վերացնել մանկամտությունը…
-Կցանկանայի առանձնակի անդրադառնալ իշխող էլիտայի վարքագծին: Արդյոք փորձ չարվե՞ց արդարացնել բռնությունը: Դա ի՞նչ հետևանքներով է հղի:
-Իհարկե, արվեց նման փորձ: Մարդիկ տեսնում են, որ որոշիչ են նեղկուսակցական շահերը: Հանրապետականներն էլ իրենք իրենց էին պաշտպանում, ինչ ուզում էին անել՝ Սերժ Սարգսյանը մեջքներին կանգնած էր…Ինչպե՞ս բացատրենք մեր իշխող էլիտային, որ իրենք ամբողջ երկրի վարչապետն են, իշխող ուժն են, ոչ թե միայն իրենց կուսակցության: Շատերն այսօր հիասթափված են, որովհետև հասկանում են, որ մոտեցումները հաճախ ընտրովի են, ոմանց ինչ-որ բաներ կարելի է, ոմանց՝ ոչ: Կուսակցությունները մեզ ուտելու են, կործանելու են մեր ազգը: ՔՊ-ականներից ոմանք, ովքեր չեն կիսում թիմակիցների կարծիքը, իրենք ձայն չունեն: Դուք պիտի բոլորի իշխանությունը լինեք, ոչ թե իրար թքածները սվաղեք, լղոզեք, հետո մի հազար հոգի ֆեյք մտնեն սոցցանցեր ու ասեն. «Վայ, ձեր ցավը տանեմ, հզոր մարդիկ»: Չի կարելի լինել կուսակցության վարչապետ, ազգի վարչապետ պետք է լինես, նաև՝ քեզ ամենաշատը հայհոյողի վարչապետը:
–Արդարադատության նախարար Ռուստամ Բադասյանը վերջերս հայտարարեց, որ դատավորների աշխատավարձը կբարձրանա 50 տոկոսով: Այս առնչությամբ շատերի մոտ դժգոհության ալիք բարձրացավ: Մարդիկ հարցնում են՝ դեռևս վեթինգ չիրականացրած՝ ինչո՞ւ պետք է քաղաքացիների հարկերի հաշվին բարձրանան դատավորների, այդ թվում՝ կոռումպացված դատավորների աշխատավարձերը: Դուք այս առնչությամբ ի՞նչ եք մտածում:
-Որքան ուզում է վարչապետն ասի, որ խոսք էր տվել բարձրացնել պաշտոնյաների աշխատավարձը, որքան էլ ասեն, որ իրավական առումով պարգևավճարները տրամադրելը ճիշտ է, ես հարցին բարոյական տեսանկյունից եմ նայում: Արդյո՞ք բարոյական է, որ ազգի կեսը սոված է, դուք ասում եք. «Մենք հո նվիրյալ չենք, որ 500 հազար դրամով աշխատենք»: Ի՞նչ ասես… Ես, օրինակ, կինոարտադրող եմ, կանգնած եմ սնանկացման եզրին. բա մե՞նք…
-Երեկ նախագահ Արմեն Սարգսյանը ստորագրել է «Ապօրինի գույքի բռնագանձման մասին» օրենքը, ակնհայտ է, որ առաջիկայում օրենքը գործի է դրվելու և սկսվելու է նախկինում թալանվածը վերադարձնելու գործընթաց: Դուք ինչ-որ ռիսկեր տեսնու՞մ եք դրանում, ի՞նչ կարող է տեղի ունենալ օրենքի գործադրման արդյունքում: Վարչապետ Նիկոլ Փաշինյանի խոսքով՝ տեղի ունեցած բռնություններն ու գործի դրված սադրանքները կապված են նշյալ օրենքի ընդունման հետ, քանի որ, նրա պնդմամբ, օրենքի ընդունումից հետո շատերը կզրկվեն ապօրինի գույքերից ունեցած իրենց մասնաբաժիններից: Հնարավո՞ր է, որ օրենքի ընդունումից հետո ևս սադրանքներ գործադրվեն:
-Բոլոր ապօրինությունները պետք է վերացվեն, ապօրինի գործունեություն ծավալածները՝ պատժվեն: Դա ակնհայտ է, չենք քննարկում… Բայց շատ բան կախված է մեխանիզմից և այդ գործն անողից. եթե, օրինակ, մեկից վերցնելու են ու տան ուրիշին, դա սեփականության վերաբաշխում է: Մարդկային գործոնն այս դեպքում շատ կարևոր է: Հարցն այն է, թե ինչպես է իրականացվելու գործընթացը:
–Մյուս կողմից՝ իշխանությանը կհաջողվի՞ արդյոք ապօրինի գույքի բռնագանձումն իրականացնել օրինական ձևով, թե՞ օրենքը նրա ձեռքում կվերածվի մահակի:
-Անշուշտ, երկուսն էլ լինելու է: Հասկանում եմ, որ հանրության պահանջն է սա, բայց այդ ուղղությամբ քայլերն ուշացան: Հիմա ավելի բարդ է լինելու այդ ամենն իրականացնելը: Համենայն դեպս, ամեն բան պետք է իրականացնել օրինական ճանապարհով: Այլ տարբերակ չկա:
Աննա Բաբաջանյան
