15.12.2024 | 21:00
Այսօր երիտասարդներն ավելի ինքնուրույն են, բայց պակաս տեղեկացված. ապաքաղաքական զրույց Անուշ Ասլիբեկյանի հետ․ ՏԵՍԱՆՅՈՒԹ
Արթուր Վանեցյանի, Սասուն Խաչատրյանի և Նիկոլ Փաշինյանի գաղտնալսման ժամանակ ԱԱԾ համապատասխան բաժնի պետը պաշտոնից ազատված է եղել
Հասարակություն
11.05.2020 | 16:21
2018-ի սեպտեմբերի 11-ին համացանցում տարածվեց ԱԱԾ տնօրենի ու ՀՔԾ պետի խոսակցության գաղտնալսման ձայնագրությունը, նույն թվականի դեկտեմբերին էլ տարածվեց ԱԱԾ տնօրենի ու վարչապետի խոսակցության ձայնագրությունը։ Երկու ձայնագրություններում էլ բարձաստիճան պաշտոնյաները քննարկում էին Մարտի 1-ի գործով անցնող անձանց կալանավորելու հարցը։
Ինչպես գիտենք, այս փաստի առթիվ Քննչական կոմիտեում հարուցվել է քրեական գործ, որի շրջանակներում հարցաքննվել է նաև վարչապետը։ Factor.am-ը գրավոր հարցմամբ դիմել էր ԱԱԾ՝ պարզելու, թե 2018-ի սեպտեմբերին ով է եղել «հեռախոսային խոսակցությունների վերահսկում» օպերատիվ-հետախուզական միջոցառման ղեկավարը, քանի որ մեզ տեղեկություն էին փոխանցել, թե տվյալ պաշտոնը զբաղեցնող անձը «անհետացել է»։
Ի պատասխան մեր հարցման, ԱԱԾ-ից հայտնել են, որ նշված միջոցառումը իրականացնում է ՀՀ ԱԱԾ օպերատիվ-տեխնիկական վարչությունը։
Ըստ ԱԱԾ պատասխանի՝ նշված ժամանակահատվածում վարչության պետի պաշտոնը թափուր է եղել: «Վարչապետի 2018 թվականի հունիսի 11-ի N687-A որոշմամբ վարչության նախկին պետը ազատվել է պաշտոնից և երկարամյա ծառայության կենսաթոշակի իրավունք ձեռք բերելու կապակցությամբ ՀՀ ԱԱԾ տնօրենի հրամանով արձակվել է ԱԱԾ-ում զինվորական ծառայությունից»,-նշված է պատասխան նամակում։
Ուշագրավ է, որ շուրջ մեկ տարի այդ պաշտոնը թափուր է մնացել և ԱԱԾ օպերատիվ-տեխնիկական վարչության պետ նշանակվել է միայն 2019-ի հուլիսին:
«2019 հուլիսի 3-ին վարչեպտի N 877Ա որոշմամբ Կարեն Ղարիբյանը նշանակվել է ԱԱԾ օպերատիվ-տեխնիկական գլխավոր վարչության պետ»,- մեզ փոխանցել են ԱԱԾ-ից։
Լիլիթ Շաբոյան
