Այսօր Ազգային ժողովի նիստի ժամանակ «Լուսավոր Հայաստան» խմբակցության ղեկավար Էդմոն Մարուքյանը արձագանքեց «Իմ քայլը» խմբակցության պատգամավոր Բաբկեն Թունյանի ելույթին, ինչից հետո ծեծկռտուք սկսվեց։
Նշենք, որ ԱԺ դահլիճում ներկա էր ՀՀ վարչապետ Նիկոլ Փաշինյանը։
«Պարոն Թունյան, որ ամբիոնից սրիկա, բան, բառեր եք օգտագործում, ես չեմ ասում իմ վրա եմ վերցնում, էդ բաները, որ ասում եք, դա լարվածություն է առաջացնում, որովհետև մեկը կարող է մտածի՝ իրեն ենք անդրադառնում, մյուսը կարող է մտածի՝ էն մյուսին եք անդրադառնում, մի արեք էդպիսի բաներ, անում եք, դրանից հետո էդպեսա լինում»,- ասաց Մարուքյանը։
«Իմ քայլ»-ից Սասուն Միքայելյանը տեղից արձագանքեց․ «հոպար, կտամ կցխեմ» ու ձեռքը տարավ սեղանին դրված շշին, սակայն նրա կողքին նստող նույն խմբակցության պատգամավոր Անդրանիկ Քոչարյանը հեռացրեց շիշը։
Մարուքյանը արձագանքեց Միքայելյանի՝ «ցխելու» սպառնալիքին եւ ասաց՝ ինչը կցխես, ապա Սասուն Միքայելյանը տեղից վեր կացավ, Մարուքյանն էլ իջավ ամբիոնից եւ Միքայելյանը նրան հարվածեց, ապա ծեծկռտուքին միացան տասնյակ պատգամավորներ։
Նրանց, փաստորեն, հետ չպահեց անգամ դահլիճում վարչապետի ներկայությունը։ Ի դեպ, ճիշտ երկու տարի առաջ հենց այս օրը Նիկոլ Փաշինյանը Աժ դահլիճում ընտրվում էր ՀՀ վարչապետ, եւ երկու տարի անց ահա այսպիսի «նվեր» մատուցեցին հեղափոխական խորհրդարանի պատգամավորները։
