30.04.2026 | 01:05
Չեմպիոնների լիգա․ «Աթլետիկոն» ու «Արսենալը» չպարզեցին հաղթողին․ ՏԵՍԱՆՅՈՒԹ
«Յուքոմ»-ի տնօրեն Արա Խաչատրյանին ԱԱԾ են հրավիրել. նա Գագիկ Խաչատրյանի գործով վկայի կարգավիճակ ունի
Հասարակություն
07.05.2020 | 19:54
Factor.am-ի տեղեկություններով «Յուքոմ» ընկերության գլխավոր տնօրեն Արա Խաչատրյանը նախօրեին հրավիրվել է Ազգային անվտանգության ծառայություն:
Տեղեկությունը Factor.am-ի հետ զրույցում հաստատեց «Յուքոմի» պաշտպանական թիմի ներկայացուցիչ Ամրամ Մակինյանը:
Փաստաբանի խոսքով՝ Արա Խաչատրյանին ԱԱԾ հրավիրելը հաջորդել է նրա բնակարանում, ավտոմեքենայում և «Յուքոմ» ընկերությունում իրավապահների կողմից կատարված խուզարկությանը:
Factor.am-ի ճշտող հարցին ի պատասխան Ամրամ Մակինյանն ասաց, որ Արա Խաչատրյանը վկայի կարգավիճակ ունի, նա ԱԱԾ է հրավիրվել ՊԵԿ նախկին նախագահ Գագիկ Խաչատրյանի վերաբերյալ քննվող քրեական գործի շրջանակներում:
Հիշեցնենք, որ մայիսի 2-ին Ազգային անվտանգության ծառայությունը խուզարկություն է իրականացրել «Յուքոմ» ընկերության նոր տնօրեն Արա Խաչատրյանի բնակարանում, ապա՝ «Յուքոմ» ընկերությունում։
Խաչատրյանի փաստաբանները պնդեցին, որ ԱԱԾ-ն ապօրինի է խուզարկել Խաչատրյանի մեքենան, բացի այդ, առանց դատարանի թույլտվության առգրավել է նրա համակարգիչը։ Ավելի վաղ տեղեկացրել էինք, որ «Յուքոմ» ընկերության սեփականատերերից Գուրգեն Խաչատրյանին մեղադրանք է առաջադրվել, նա մեղադրվում է խոշոր չափի կաշառք վերցնելու համար: Դատարանը Գուրգեն Խաչատրյանին կալանավորելու որոշում է կայացրել, սակայն նա թաքնվում է իրավապահներից:
Հայտարարվել է հետախուզում:
Նարեկ Կիրակոսյան
