22.05.2026 | 08:56
Սուտ է, Google-ի գոյութան ողջ ընթացքում Տիգրանաշենի անունն այդպես է եղել. Փաշինյան․ ՏԵՍԱՆՅՈՒԹ
Ինչի դիմաց է «Կապիտալ Բիլդ» ՍՊԸ-ն Երևանին 100 մլն դրամանոց փոշեկուլներ նվիրել
Տնտեսություն
06.05.2020 | 19:47
Քիչ առաջ Երևանի քաղաքապետարանի մամուլի խոսնակ Հակոբ Կարապետյանը տեղեկություն տարածեց, որ քաղաքապետարանի և «Կապիտալ Բիլդ» ՍՊԸ-ի միջև 01.04.2020թ-ին կնքված նվիրաբերության պայմանագրով՝ Երևանի քաղաքապետարանը ստացել է երկու հատ 2020 թվականի արտադրության քաղաքային կոմունալ վակուումային մեքենա (փոշեկուլ): Նվիրաբերված մեքենաների ընդհանուր արժեքը կազմում է 100 մլն դրամ:
Ուշագրավ է, որ «Կապիտալ Բիլդ» ՍՊԸ-ն առաջին անգամ չէ, որ Երևանին նման թանկարժեք նվեր է մատուցում: Ընդամենը մեկ ամիս առաջ քաղաքապետ Հայկ Մարությանը տեղեկացրել էր, որ այս ընկերությունը քաղաքին երեք փոշեկուլ է նվիրել:
Երևանի քաղաքապետարանի պաշտոնական կայքից Factor.am-ը տեղեկացավ, որ 2019 թվականի փետրվարին քաղաքապետարանն այս ընկերությանը Կոմիտասի պողոտայում անշարժ գույքի հասցեներ է տրամադրել: Խոսքը, ըստ քաղաքապետարանի կայքի, Կոմիտասի պողոտա, հ. 19/1 հասցեում «Կապիտալ Բիլդ» ՍՊԸ-ի կողմից կառուցված բնակելի շենքի մասին է:
Հիշեցնենք, որ նախորդ տարի ևս քաղաքապետարանին մասնավոր ընկերությունների կողմից տեխնիկա էր նվիրաբերվել, ինչն աղմուկի պատճառ դարձավ:
Վերհիշելով նշենք, որ «Ն և Ս քոնսթրաքշն» ՍՊԸ-ն քաղաքապետարանին նվիրել է 10 հատ ԳԱԶ մակնիշի և 4 հատ ԿամԱԶ մակնիշի աղբատարեր։ Ընկերության բաժնետերերից մեկն ԱԱԾ քննչական դեպարտամենտի պետ Արթուր Աղաջանյանի կինն է։ Այս ընկերությունը պատրաստվում է բազմաֆունկցիոնալ բնակելի շենքեր կառուցել Դավիթաշեն վարչական շրջանի Եղվարդի խճուղի հ.22 և Անաստաս Միկոյան հ. 64 հասցեներում։ Այդ հասցեները ընկերության հողամասին տրամադրվել են Երևանի քաղաքապետ Հայկ Մարությանի 2019թ-ի մարտի 22-ի որոշմամբ:
Երեք հատ «ԿամԱԶ» մակնիշի աղբատար էլ քաղաքապետարանը ստացել է գործարար, նախկին պատգամավոր Սամվել Ալեքսանյանի հորեղբոր որդու՝ Հրաչյա Շարոյանի «Ալեքս էնդ հոլդինգ» ընկերությունից։ Հայկ Մարությանի որոշմամբ ՝ երկարացվել էր Կոմիտասի «Երևան Սիթի» սուպերմարկետի տարածքի վարձակալության պայմանագիրը:
Իսկ ահա կալանավորված ՊԵԿ նախկին նախագահ Գագիկ Խաչատրյանի ընտանիքը քաղաքապետարանին նվիրել է աղբատար ավտոմեքենաների կայանատեղի: Ընդդիմադիրները պնդում են, որ սրա դիմաց քաղաքապետը թույլ է տվել, որպեսզի Խաչատրյանները Տերյան փողոցում՝ Աֆրիկյանների տան նախկին տարածքում կառուցվող շենքի հարկերի թիվն ավելացնեն:
Հիշեցնենք, որ երբ հայտնի դարձավ, թե ովքեր են նվիրատուները, ընդդիմությունը հայտարարեց քաղաքապետի կողմից կոռուպցիոն գործարքների ռիսկերի մասին, ինչը վերջինս, բնականաբար, հերքեց։
Նարեկ Կիրակոսյան
