11.06.2026 | 18:53
ԱՄԷ առաջնորդները շնորհավորել են Նիկոլ Փաշինյանին
Շիրակի մարզում կորոնավիրուսից մահվան 4-րդ դեպքն է գրանցվել. մահացածը Գյումրիի բնակիչ է
06.05.2020 | 15:11
Շիրակի մարզում կորոնավիրուսից մահվան 4-րդ դեպքն է գրանցվել. մահացածը 64-ամյա կին է, Գյումրիի բնակիչ: Նա խրոնիկ հիվանդություններ է ունեցել։ Այս մասին Factor.am-ին հայտնեցին Շիրակի մարզպետարանի տեղեկատվության ու հասարակայնության հետ կապերի բաժնից։
Մարզպետարանից մեզ նաև փոխանցեցին, որ Գյումրիում ու մարզում իրավիճակը վերահսկելի է, քանի որ կորոնավիրուսի նոր օջախներ չկան. հիմնական օջախները Գյումրին ու Մարալիկն են:
Գյումրու ինֆեկցիոն հիվանդանոցում, մայիսի 6-ի դրությամբ, կորոնավիրուսով 76 հիվանդ է բուժում ստանում, նրանցից 70-ը Շիրակի մարզի բնակիչ է: Առողջապահության նախարարության հանձնարարությամբ՝ դրական արդյունքով, բայց հիվանդության անախտանիշ ընթացքով 23 պացիենտ ինֆեկցիոն հիվանդանոցից տեղափոխվել է Ծաղկաձորում առանձնացված հյուրանոց։
Նշենք, որ Երևան տեղափոխված հիվանդների թիվը 19-ն է, ընդհանուր առմամբ՝ առողջացել և հիվանդանոցից դուրս է գրվել 21 պացիենտ։ Շիրակի մարզում այս պահին մեկուսացման և ինքնամեկուսացման ցուցում ունի 315 քաղաքացի։
Հիշեցնենք, որ Շիրակի մարզում կորոնավիրուսից մահվան նախորդ 3 դեպքերը գրանցվել էին Անի խոշորացված համայնքի Մարալիկ ու Ձորակապ բնակավայրերում։
Էմմա Չոբանյան
