Մանվել Գրիգորյանի օգնականին հեռացրել են Զինծառայողների ապահովագրության հիմնադրամի հոգաբարձուների խորհրդից

ԱԺ նախկին պատգամավոր Մանվել Գրիգորյանի օգնական, Զինծառայողների ապահովագրության հիմնադրամի հոգաբարձուների խորհրդի անդամ Մեսրոպ Մանուկյանը տեղեկացրել է, որ իրեն հեռացրել են խորհրդից․

«Տեղյակ եք, որ Նիկոլ Փաշինյանի իշխանության գալուց մի քանի ամիս անց, որպես «Զինծառայողների ապահովագրության հիմնադրամի» հոգաբարձուների խորհրդի անդամ, առաջինը բարձրաձայնեցի, որ վարչապետի կողմի հայտարարված թվերը հիմնադրամում չեն արտահայտվում. դրանք կամ յուրացվում են, կամ` թերհավաքագրվում. այդ տենդենցը գնալով խորանում էր, որևէ քայլ չէր ձեռնարկվում, իմ շարունակական բարձրաձայնումները նախկինի պես մնում էին` «ձայն բարբառոյ յանապատի»` իշխանությունների համար դառնալով այլևս խիստ անհաճո: Ի դեպ. այս ամենին զուգահեռ` հիմնադրամը նաև ինը ամիս շարունակ նիստ չի գումարում: Առ ժամանակ առաջ նամակ ստացա, որ ինձ հեռացնում են հիմնադրամից, խնդրեցի` հարցին իրավական կարգավորում տալ և ինձ ներկայացնել իրավական հիմքը, որովհետև ընտրվել եմ հինգ տարի ժամկետով:

Հ.Գ. Ստացվում է, որ իշխանությունները` գումարների անհամապատասխանության մասին բարձրաձայնողներից փորձում է անպայման ազատվել`այս կամ այն պատրվակով հեռացնելով նրանց հիմնադրամից»։

Հիշեցնենք, որ Մանուկյանը կառավարության դիմաց կազմակերպված բողոքի ակցիային էր եկել և վարչապետից պահանջում էր գումար տրամադրել զոհված զինծառայողների ընտանիքներին, վարչապետն էլ ճանաչելով, որ նա Մանվել Գրիգորյանի օգնականն է եղել հորդորեց գնալ-վաճառել Գրիգորյանի թանկարժեք իրերը և օգնել մարդկանց։

Նշենք, որ հիմնադրամից էլ մեզ հայտնեցին, որ Մանուկյանին փոխարինելու առաջարկ ստացել են ԵԿՄ-ից, որտեղից իրենց հայտնել են, որ Մեսրոպ Մանուկյանը չէ իրենց ներկայացուցիչը և այլ թեկնածուի են առաջարկել։

Լիլիթ Շաբոյան