11.01.2025 | 10:54
Օդում նկատվող սառցե բյուրեղները ձյան տեղումներ չեն․ Գագիկ Սուրենյան
Կնոջ սեռը թիրախավորելով՝ նրան վիրավորելը բացարձակ մերժելի երևույթ է. Արման Թաթոյան
Քաղաքականություն
28.04.2020 | 23:59
Կնոջ սեռը թիրախավորելով նրան վիրավորելը ու դա այնպես անելը, որ վիրավորանք հասցվի կնոջ մասնավոր կամ ընտանեկան կյանքին, բացարձակ մերժելի երևույթ է: Այս մասին ֆեյսբուքում գրել է ՀՀ մարդու իրավունքների պաշտպան Արման Թաթոյանը:
«Նույնքան բացարձակ մերժելի է, երբ դա արվում է քաղաքական կամ ցանկացած այլ քննարկման շրջանակում։ Առավել ևս անընդունելի է, երբ դա տեղի է ունենում խորհրդարանի նիստում ու այն էլ կին պատգամավորի նկատմամբ:
Կնոջ նկատմամբ հարգանքը, նրա արժանապատվությունը երաշխավորելը և պայքարը կարծրատիպերի դեմ պետք է լինի յուրաքանչյուրիս առաքելությունը:
Նման իրավիճակներ մենք չենք ունենա միայն այն ժամանակ, երբ բանավեճում թիրախավորենք ոչ թե ընդդիմախոսի սեռը, այլ քննարկենք միայն թեման ու առարկայական հարցեր:
Ազգային ժողովի Մարդու իրավունքների պաշտպանության և հանրային հարցերի մշտական հանձնաժողովի փոխնախագահ Անի Սամսոնյանը մեր կարևոր գործընկերն է և կարևոր ներդրում ունի Հայաստանում մարդու իրավունքների պաշտպանության գործում:
Կանանց նկատմամբ մեր հասարակությունում պետք է լինի արժանապատիվ, հավասար վերաբերմունք։ Մենք պետք է խրախուսենք կնոջ մասնակցությունը երկրի քաղաքական կյանքին:
Այս կանոնները պետք է ունենան բացարձակ կիրառություն և վերջ»,- գրել է Պաշտպանը:
Հիշեցնենք, որ ԱԺ փոխխոսնակ Ալեն Սիմոնյանը, այսօր խորհրդարանում ծագած լեզվակռվի ընթացքում հակադարձելով ԼՀԿ պատգամավոր Անի Սամսոնյանի՝ իր հասցեին հնչեցրած սուր քննադատությանը՝ ասել էր. «Ես ներողություն եմ խնդրում, տիկի՛ն Սամսոնյան, բայց ես ամուսնացած եմ, առաջարկում եմ իմ մասին ավելի քիչ խոսել, դա տգեղ է դիտվում։ Անընդհատ իմ մոտ տպավորություն է, որ Ձեր մոտ ինչ-որ մանյակալ բան է»:
