Փաստաբանը գրեթե վստահ է, որ Խաչատրյանները վարչապետի խոսնակին դատի կտան

«Գուրգեն Խաչատրյանի հետ այն, ինչ  տեղի է ունեցել, ինքն ասել է, ես դրանից ավելի ոչինչ չեմ կարող ասել»,- Factor.am-ին ասաց Խաչատրյանների պաշտպանական թիմի անդամ Երեմ Սարգսյանը՝ պատասխանելով հարցին, թե ով է ճնշել Գուրգեն Խաչատրյանին հրաժարվել «Յուքոմ» կապի ընկերությունից:

Հիշեցնենք, որ այսօր «Գալաքսի» ընկերությունների խմբի համահիմնադիր Գուրգեն Խաչատրյանը տեղեկացրել էր, որ իր նկատմամբ բարձրաստիճան պաշտոնյաների մակարդակով ուղղակի և անուղղակի ճնշումներ են եղել՝ օտարել ընկերությունը: Այս հայտարարությանն ի պատասխան վարչապետի խոսնակը հայտարարություն տարածեց և ասաց, որ Խաչատրյանները հայաստանյան մի շարք պաշտոնյաների մոտ ցանկություն են հայտնել պետությունից թալանած գումարները հետ տալ:

Factor.am-ն այսօր ամբողջ օրվա ընթացքում ճնշումների վերաբերյալ փորձեց պարզաբանումներ ստանալ Գուրգեն Խաչատրյանից, սակայն նա մեր հեռախոսազանգերին չպատասխանեց: Նրա պաշտպան Երեմ Սարգսյանն, անդրադառնալով վարչապետի խոսնակի այն հայտարարությանը, թե Խաչատրյանները հայաստանյան պաշտոնյաներին խոստացել են «թալանը ետ վերադարձնել», ասաց. «Ես իրավաբան եմ, ես խոսում եմ քրեական գործի մասին, դուք հարցնում եք, թե արդյոք Խաչատրյանը ինչ-որ մեկի հետ երբևէ խոսել է: Այնքանով որքանով ես եմ այս թեմայի հետ առնչվում՝ ոչ, բայց ես չեմ կարող այդ հարցերին պատասխանել»:

Երեմ Սարգսյանը չի բացառում, որ Մանե Գևորգյանի այս ձևակերպման համար Խաչատրյանները դիմեն դատարան. «Այս պահին քննարկում է գնում, մենք կամփոփենք և մեր դիրքորոշումը կհայտնենք, թե ինչ իրավական գործընթացներ կլինեն: Արդյոք իրավասու են իրենք մեղադրել և արդյոք սա անմեղության կանխավարկածի խախտում չէ: Գրեթե վստահ եմ, որ նման քայլ կլինի»:

Այսօր արդեն տեղեկացրել էինք, որ Խաչատրյանների գույքի վրա արդեն մեկ ամիս է, ինչ կալանք է դրված: Պաշտպանը նշեց, որ միջնորդել են, որպեսզի որոշակի փոփոխություններ իրականացվեն:

«Գույքի մասով ակնհայտ խնդիրներ են առկա: Մասնավորապես, Գուրգեն Խաչատրյանի մասով առաջադրված մեղադրանքում նշված է 1,5 միլիարդ դրամի ենթադրյալ վնաս, իսկ օրենքն ասում է, որ պատճառված ենթադրյալ վնասից ավել որևէ մեկը իրավունք չունի կալանք դնի գույքի վրա: Գույքի վրա կալանք դնելու հիմքեր չկան, բայց եթե լինի էլ, ապա չափի մասով լուրջ խնդիրներ կան: Հիմա հարց է առաջանում, թե ինչու է գերազանցող չափի վրա կալանք դրվել»,- ասաց նա և նշեց, որ օրենքով մատնանաշել են, թե որ գույքի վրա կալանք դնեն, բայց միջնորդությունն անարձագանք է մնացել:

Նարեկ Կիրակոսյան