20.01.2026 | 19:45
Արտաքին հետախուզությունը զգուշացնում է․ ընտրական սաբոտաժ և գործակալների ակտիվացում 2026-ին․ ՏԵՍԱՆՅՈՒԹ
Հեռակա կոշտ բանավեճ՝ Սերժ Սարգսյանի ու Փաշինյանի խոսնակի միջև
Քաղաքականություն
28.04.2020 | 21:52
Հեռակա բանավեճ է ծավալվել ՀՀ երրորդ նախագահ Սերժ Սարգսյանի ու վարչապետ Նիկոլ Փաշինյանի մամուլի քարտուղար Մանե Գևորգյանի միջև։
Վերջինս այսօր գրառմամբ անդրադարձել էր Ֆինանսների նախկին նախարար Գագիկ Խաչատրյանի ու նրա որդիների ունեցվածքին, նշելով, որ նրանք «ղեկավարել են Հայաստանում երկար տարիներ գործած կոռուպցիոն, մաֆիոզ համակարգ, ինչի արդյունքում կուտակել են մի քանի հարյուր միլիոն դոլարի ապօրինի հարստություն»։ Վարչապետի խոսնակը հայտարարությունում հիշատակել էր նաև Սերժ Սարգսյանի անունը՝ հրապարակելով Կառավարության ունեցած տեղեկությունը, որ UCOM ընկերությունում կոռուպցիոն ծագման փայաբաժին ունի նաև Սերժ Սարգսյանի փեսա Միքայել Մինասյանը։
«Վարչապետն ակնկալում է, որ իրավապահները պատշաճ քննության կենթարկեն նաև Սերժ Սարգսյանի ընտանիքի ղեկավարած կոռուպցիոն համակարգը, որը նույնպես արտահայտվել է տարբեր հաջողակ բիզնեսներում փայաբաժիններ ձեռք բերելով»,- գրել էր վարչապետի մամուլի քարտուղարը։
Կարճ ժամանակ անց գրառմանը պատասխանեց Սերժ Սարգսյանը, մասնավորապես՝ նրա գրասենյակը հայտարարեց, թե լավ կլինի վարչապետի մամուլի քարտուղարը «տեր կանգնի իր ղեկավարի բովանդակազուրկ լայվերին` հասարակության մեջ օրեցօր խորացող հիասթափությունը և դրա վտանգավոր հետևանքները կանխելու նպատակով»:
Սերժ Սարգսյանի գրասենյակը նաև նշել էր․ «Մի ամբողջ պետություն և նրա իրավական համակարգը սոցիալ-տնտեսական այս դժվարին պայմաններում անգամ սեփական քմահաճույքներին ու անձնական վրեժխնդրությանը ծառայեցնելու մարմաջով տառապող ղեկավարի անպատասխանատու հայտարարությունները վաղուց դուրս են ողջամտության ու իրավական տրամաբանության սահմաններից և այդ հարթության մեջ մեկնաբանման ենթակա չեն»։
Քիչ առաջ Սերժ Սարգսյանի հայտարարությանը հակադարձեց Նիկոլ Փաշինյանի մամուլի քարտուղար Մանե Գևորգյանը՝ գրառմամբ․ «Ով ով՝ բայց Սերժ Սարգսյանը լավ գիտի իմ ղեկավարի «իմաստազուրկ լայվերի» արժեքը։ Նաև դրանց շնորհիվ է պարոն Սարգսյանը հայտնվել անհույս թոշակառուի կարգավիճակում։ Ինչ վերաբերում է հանրության հիասթափությանը, դրա միակ պատճառն այն է, որ պարոն Սարգսյանը և նրա կոռումպացված շրջապատը դեռևս գտնվում են ազատության կամ փախուստի մեջ»։
Հիշեցնենք, հեղափոխությունից հետո Սերժ Սարգսյանին կես միլիարդ դրամ հափշտակության մեղադրանք է առաջադրվել։ Նա կտրականապես հերքել է իր մեղքը՝ շեշտելով․ «Արցախը երբեք չի լինելու Ադրբեջանի կազմում»։
Ռոբերտ Անանյան
