«Ակցիան կապված է իշխանության տգետ կառավարման հետ». ինչու են Հայկ Բարսեղյանին բերման ենթարկել

Այսօր առավոտյան կառավարության դիմացից Ոստիկանության կենտրոնական բաժին բերման է ենթարկվել SOS նախաձեռնության անդամ, ակտիվիստ Հայկ Բարսեղյանը:

Factor.am-ի հետ զրույցում Հայկը փոխանցեց, որ իրեն բերման են ենթարկել ակցիայի ժամանակ:

«Առավոտ ժամը 8:10-ին եկա կառավարության մոտ, որպեսզի քայլեմ աջ-ձախ, դա իմ ակցիան էր: Ժամը արդեն 8:30-ին ինձ ոչ նորմալ ձևով բերման ենթարկեցին՝ ասելով, որ ես խախտել եմ արտակարգ դրության կանոնները»,- ասաց նա:

Հայկ Բարսեղյանը նշեց, որ իրեն երկու ժամ պահել են Ոստիկանության բաժնում, որից հետո նա կրկին վերադարձել է կառավարության շենքի մոտ և շարունակում է իր բողոքի ակցիան:

Հայկի խոսքով՝ իր ակցիան ուղղված է իշխանությունների դեմ, որոնք երկիրը ճիշտ չեն կառավարում: «Ակցիան կապված է իշխանության տգետ կառավարման հետ: Իրենց կայացրած որոշումները ձևական են, ոչ միայն չեն լուծում ոչ մի խնդիր, այլ նաև ավելացնում են լուրջ խնդիրներ: Խնդիրներն այնքան են շատացել, որ մարդկանց տեղաշարժման համար ձերբակալում են, մարդիկ չունեն լույս, մարդիկ սոված են: Այս դեպքում էլ խոսալ չի լինում, պետք է հելնել փողոց: Սա նախազգուշացում է իշխանությանը, որպեսզի նրանք գիտակցեն կամ հրաժարական տան, կամ ներողություն խնդրեն տգետ կառավարման համար և փորձեն ուղղվել: Հրաժարական պետք է տան Նիկոլ Փաշինյանի գլխավորությամբ բոլոր երեխաները, որոնք կառավարում են հանրապետությունը»:

Ոստիկանության հասարակայնության հետ կապի և լրատվության վարչությունից տեղեկացրել են, որ Հայկ Բարսեղյանին բերման են ենթարկել վարչական իրավախախտում կատարելու համար:

Հիշեցնենք, որ Հայկ Բարսեղյանը տեղեկացրել էր, որ իր մտերիմ մարդկանցից մեկի տան լույսն անջատել են, որտեղ 8 մարդ է ապրում, դրանից հետո իր ընկերը՝ Միքայել Մարգարյանը, գնացել է կառավարական շենքի մոտ ակցիա անելու և պարզապես ասելու, որ լույսը մի անջատեք:

«Իր հետ եղել են իր երեխաները, որոնցից մեկը՝ անչափահաս: Դրանից երկու րոպե անց ձերբակալել են և՛ Միքայելին, և՛ երեխաներին: Ոչ միայն ձեռնաշղթա են հագցրել Միքայելի, այլև 17 տարեկան երեխու ձեռքերին»,- երեկ ասել էր Հայկ Բարսեղյանը և տեղեկացրել իր այսօրվա ակցիայի մասին:

Նարեկ Կիրակոսյան