20.01.2026 | 11:26
ԱԺ-ն առաջին ընթերցմամբ ընդունեց 27-37 տարեկան չծառայածներին քրեական պատասխանատվությունից ազատելու նախագիծը
«Էրեբունի» ԲԿ-ի բուժաշխատողներ են մեկուսացվել՝ կորոնավիրուսով վարակված պացիենտի հետ շփվելու պատճառով․ տնօրենը չի հիշում, թե քանի հոգի են
25.04.2020 | 20:10
«Էրեբունի» բժշկական կենտրոնի մի քանի բուժաշխատողներ մեկուսացվել են՝ կորոնավիրուսով վարակված պացիենտի հետ շփվելու պատճառով: Մեկուսացման մասին Factor.am-ին փոխանցված տեղեկությունը մեզ հետ զրույցում հաստատեց ԲԿ-ի գործադիր տնօրեն Միքայել Մանուկյանը:
Մեր տեղեկություններով՝ խոսքը մոտ երկու տասնյակի հասնող բուժաշխատողների մասին է: Մեր հստակեցնող հարցին ԲԿ-ի տնօրենն ուշագրավ պատասխան տվեց. պարզվեց՝ նա չի հիշում, թե իր ղեկավարած կենտրոնի քանի բուժաշխատող է մեկուսացվել:
«Թիվ չեմ կարող ասել, չեմ հիշում: Սա մեր պրոբլեմն է, մենք լուծում ենք, թե քանի հոգի է՝ այդ տեղեկությունը չեմ տալու»,- ասաց Միքայել Մանուկյանը:
Factor.am-ը տեղեկացել էր, որ «Էրեբունի» ԲԿ-ի բուժանձնակազմը շփվել է այն նույն քաղաքացու հետ, ում օրերս «Էրեբունի»-ից տեղափոխել էին Ֆանարջյանի անվան ուռուցքաբանության ազգային կենտրոն, ինչի արդյունքում այնտեղի 15 բուժաշխատող է մեկուսացվել։ Այս մասին տեղեկացրել էինք երեկ:
«Էրեբունի» ԲԿ-ի տնօրենից հետաքրքրվեցինք՝ արդյո՞ք հայտնի է, թե ում հետ են շփվել կենտրոնի բուժաշխատողները: «Իրենք կարող են իրենց տներում շփված լինեն, պարտադիր չէ, որ հիվանդի հետ շփված լինեն»,- ասաց նա:
Միքայել Մանուկյանը նաև նշեց, որ տեղեկություններ չունի՝ արդյո՞ք բուժաշխատողները թեստավորվել են: Նա միայն փոխանցեց, որ բժշկական կենտրոնը անձնակազմի խնդիր չունի, ԲԿ-ի բնականոն աշխատանքները շարունակվում են:
Նարեկ Կիրակոսյան
