18.12.2025 | 17:43
Եկել եմ Գերագույն հոգևոր խորհրդի նիստին, օրակարգը չգիտեմ. Վահան սրբազան․ ՏԵՍԱՆՅՈՒԹ
Հայաստանի և Ադրբեջանի ԱԳՆ ղեկավարների ու ԵԱՀԿ ՄԽ համանախագահների համատեղ հայտարարությունը
Քաղաքականություն
22.04.2020 | 10:01
Հայաստանի և Ադրբեջանի արտգործնախարարները և ԵԱՀԿ Մինսկի խմբի համանախագահները պայմանավորվել են պահպանել սերտ կապերը և հնարավորինս շուտ շարունակել բանակցությունները անձամբ: Այս մասին ասվում է երկու երկրների արտաքին գործերի նախարարների և ԵԱՀԿ Մինսկի խմբի համանախագահների համատեղ հայտարարության մեջ, որն ընդունվել է ապրիլի 21-ին տեղի ունեցած տեսակապի արդյունքում: Հայտարարության մեջ, մասնավորապես, նշվում է.
«Հայաստանի և Ադրբեջանի արտգործնախարարներ Զոհրաբ Մնացականյանը, Էլմար Մամեդյարովը և ԵԱՀԿ Մինսկի խմբի համանախագահները (Իգոր Պոպով՝ Ռուսաստան, Ստեֆան Վիսկոնտի՝ Ֆրանսիա և Էնդրյու Շոֆեր՝ ԱՄՆ) հաճախ հեռավար խորհրդակցություններ են անցկացնում մարտի կեսից, ներառյալ ապրիլի 21-ին անցկացված համատեղ տեսակապը: ԵԱՀԿ գործող նախագահի անձնական ներկայացուցիչ Անջեյ Կասպրշիկը այս խորհրդակցություններին նույնպես մասնակցել է:
Խորհրդակցությունների ընթացքում մասնակիցները քննարկել են առողջապահական ճգնաժամի ազդեցությունը տարածաշրջանում և վերջին զարգացումները տեղերում: Նրանք նաև դիտարկել են ղարաբաղյան հիմնախնդրի կարգավորման գործընթացում իրականացվող հետագա քայլերը՝ համաձայն իրենց կողմից արված համատեղ հայտարարության, որը 2020 թվականի հունվարի 30-ին հրապարակվել է Ժնևում:
Ընդունվել է, որ COVID-19 համաճարակի հետևանքով առաջացած արտակարգ իրավիճակի պատճառով հետաձգվել է նախկինում համաձայնեցված մարդասիրական միջոցառումների իրականացումը: Նախարարների մակարդակով անցկացվող անձնական հանդիպումները և համանախագահների այցերը տարածաշրջան, որոնք համաձայնեցվել են Ժնևում, նույնպես հետաձգվել են։ Այնուամենայնիվ, այս միջոցառումների նախապատրաստման անհրաժեշտ աշխատանքները շարունակվում են:
Համանախագահները ընդգծել են հրադադարի խիստ պահպանման կարևորությունը ու ներկա պայմաններում սադրիչ գործողություններից ձեռնպահ մնալը և կողմերին կոչ են արել միջոցներ ձեռնարկել լարվածության հետագա նվազեցման ուղղությամբ: Նրանք նաև ներկա պայմաններում շարունակվող աշխատանքի համար շնորհակալություն են հայտնել ԵԱՀԿ գործող նախագահի անձնական ներկայացուցչին և ընդգծել են մոնիթորինգի շուտափույթ վերսկսման անհրաժեշտությունը:
Հաշվի առնելով այն հսկայական խնդիրները, որոնց ներկայում բախվում է ողջ բնակչությունը՝ առանց հաշվի առնելու քաղաքական սահմանները, և որոնք յուրաքանչյուր մարդկային կյանքի արժեքի լուրջ հիշեցում են ծառայում, արտգործնախարարներն ու համանախագահները հույս են հայտնել, որ գլոբալ համավարակին պատասխանելու վճռականությունը ստեղծագործական և կառուցողական խթան կհաղորդի խաղաղ գործընթացին:
Համանախագահները ուշադրություն են դարձրել Միացյալ ազգերի կազմակերպության գլխավոր քարտուղարի առողջապահական ներկա ճգնաժամի ընթացքում հրադադարի գլոբալ միջոցառումների մարտի 23-ի կոչին և համանախագահների մարտի 19-ի հայտարարությանը:
Արտգործնախարարներն ու համանախագահները պայմանավորվել են պահպանել սերտ կապերը և հնարավորինս շուտ շարունակել բանակցությունները անձամբ»:
