Քաղաքականություն
21.04.2020 | 22:05
«Նրանք, ովքեր ապօրինի գույքի բռնագանձման հետևանքով կկորցնեն միլիոններ, մեծ աղմուկ կանեն և համապատասխան ծուղակներ կլարեն նաև քաղաքական դաշտում: Նրանք դա ուղղակի կերպով չեն անի, գույքի մասին չեն խոսի, փոխարենը կարծարծեն բարոյական, ազգային արժեքներին վերաբերող հարցեր: Ի դեպ, ում ունեցվածքին դիպչում են, սկսում է ազգային արժեքներից խոսել»,- Factor.am-ի հետ զրույցում նման տեսակետ հայտնեց Երևանի պետական տիկնիկային թատրոնի տնօրեն և գեղարվեստական ղեկավար Ռուբեն Բաբայանը:
Նշենք, որ ըստ «Ապօրինի ծագում ունեցող գույքի բռնագանձման մասին» օրենքի՝ ապօրինի ծագում ունեցող գույքը ենթակա է բռնագանձման, եթե ներկայացված ապացույցների գնահատմամբ՝ դատարանը հանգում է հետևության, որ այդպիսի գույքի շուկայական արժեքը հայցի ներկայացման պահին գերազանցում է 50 միլիոն ՀՀ դրամը: Ռուբեն Բաբայանի համոզմամբ՝ ապօրինի գույքի տնօրինումը վնաս է հասցնում ոչ միայն անհատների, այլ ամբողջ հանրությանը:
«Մենք գիտենք, որ, օրինակ, ապօրինի կերպով կառուցված դղյակները ոչնչացրել են հրաշալի կանաչ տարածքներ, Հայաստանը դարձրել են քաղցկեղի բուն»,- նկատեց նա:
Պարոն Բաբայանն անդրադարձավ նաև վարչապետ Նիկոլ Փաշինյանի՝ օրերս ֆեյսբուքյան ուղիղ եթերում հնչեցրած հայտարարությանը՝ հիասթափությունների մասին: Վարչապետը հիասթափություն ապրողների խմբին դասել էր նաև «իր հետ քայլողներին», «ընկեր-բարեկամներին», որոնք ինչ-որ հույսեր են կապել իր՝ իշխանության գալու հետ, բայց որոնց կյանքում դրանից ոչինչ չի փոխվել:
«Թերևս ոմանց թվացել է, որ վարչապետի կայացրած որոշումների վրա մեծ ազդեցություն պետք է ունենան, և երբ դա տեղի չի ունեցել, «նեղացել են»: Շատ բաներ կարող են եղած լինել: Այս ամենն ինձ հիշեցրեց հեղափոխությունից հետո մեծ թվով մարդկանց հոսքը՝ իմքայլական դառնալու համար: Ի՞նչ էր սա՝ գաղափարական մղու՞մ, թե՞ որևէ պաշտոն զբաղեցնելու անհագ ցանկություն: Հուսով եմ, որ մեր երկրում պաշտոնի վերաբերյալ մարդկանց մտայնությունները կփոխվեն, և մարդիկ կհասկանան, որ պաշտոն ստանձնում են մասնագիտական որակներից ելնելով միայն»,- եզրափակեց մեր զրուցակիցը:
Աննա Բաբաջանյան
