Լավրովը խոսել է Երևանի և Մինսկի համար գազի գնի նվազեցման հնարավորության մասին

Նույնիսկ էներգիակիրների գների ներկայիս անկման համատեքստում պայմանագրային պարտավորությունները մնում են, այդ թվում ՝ Հայաստանի և Բելառուսի համար։ Այս մասին այսօր հայտարարել է Ռուսաստանի արտգործնախարար Սերգեյ Լավրովը, տեղեկացնում է «ՌԻԱ Նովոստին»։

Լավրովը հիշեցրել է, որ երբ կնքվեցին այդ համաձայնագրերը, էներգիառեսուրսների սահմանված գինը շուկայականից ցածր է եղել: «Ես կարծում եմ, որ դաշնակիցները, իհարկե, պետք է ստանան տնտեսական առավելություններ: Բայց երբ գինը հասել է նրան, որը հիմա է, պետք է հաշվի առնել, որ որոշ պայմանագրային պարտավորություններ կան», – ասել է Լավրովը ՝ պատասխանելով այն հարցին, թե ինչու Ռուսաստանը հիմա չի նվազեցնում գազի գները Եվրասիական տնտեսական միության երկրների համար, ինչպես դա ավելի վաղ արվել է ԵԱՏՄ-ից դուրս մի շարք երկրների համար։ Լավրովը նշել է, որ ավելի վաղ Մոսկվան առաջարկներ էր ստացել ՝ վերանայելու գազի գները: «Համոզված եմ, որ դիմումների քննարկման ընթացքում, իսկ դրանք վերջերս եղել են ինչպես մեր բելառուս ընկերներից, այնպես էլ հայ ընկերներից, իհարկե, հաշվի են առնվում մեր դաշնակից հարաբերությունները: Բայց, հավանաբար, սխալ է հիշել դա միայն այն դեպքում, երբ իրավիճակը դառնում է տրամագծորեն հակառակն այն իրավիճակի, որը երեք-չորս տարի առաջ էր», – ասել է Ռուսաստանի արտգործնախարարը:

Նա հավելել է, որ տրամաբանություն տեսնում է գազի գների վերանայման հարցը բարձրաձայնելու մեջ, «բայց այդ դեպքում իսկապես պետք է մինչև վերջ տրամաբանության սահմաններում լինենք»:

«Երբ այն գինը, որն այժմ հասանելի է Հայաստանի և Բելառուսի համար, երկու-երեք անգամ ցածր էր շուկայական գնից, այն ընդունվել է, որ այդպել էր պետք է լիներ: Եվ ոչ մեկը չի ասել, որ դա քաղաքականություն է»,- նշել է Լավրովը։