ՀՀ արդարադատության նախարարության իրավաբանական անձանց պետական ռեգիստրի գործակալությունում քիչ առաջ Արա Խաչատրյանին գրանցել են «Յուքոմ» ընկերության տնօրեն: Այս մասին Factor.am-ին տեղեկացրեց ԱՆ խոսնակ Լուսինե Մարտիրոսյանը:
Ի դեպ, «Յուքոմ»-ի վեց տոկոսի բաժնետեր, նախկին տնօրեն Հայկ Եսայանը հանդես է եկել հերթական տեսաուղերձով՝ հայտնելով, որ ինքը վերջնականապես դադարեցնում է ընկերության կառավարումը և իր թիմով պատրաստվում է հիմնել նոր կապի օպերատոր։
Հիշեցնենք, որ ապրիլի 10-ին հայտնի դարձավ, որ «Յուքոմ» ընկերության բազմաթիվ աշխատակիցներ, այդ թվում ղեկավար անձնակազմն ամբողջությամբ, հրաժարական են տվել: Հրաժարական տված անձանց թվում են Ալեքսանդր և Հայկ Եսայանները՝ «Յուքոմի» հիմնադիրներից: Ընդհանուր դիմում գրածների թիվը կազմում է 856 մարդ:
«Որոշ իրավաբաններ նշում են, որ ապրիլի 14-ից Արա Խաչատրյանն է տնօրեն։ Շատ լավ, եթե Արա Խաչատրյանն է, ու՞ր է Արա Խաչատրյանը, ինչու չի եկել ոչ մեկիդ հետ հանդիպել, սա ի՞նչ ընկերություն է, ինչո՞ւ է կապի ապահովում իրականացնում։ Թող ինքը գա, որոշումներ կայացնի, ես պաշտոնապես ասում եմ՝ ես դադարեցնում եմ «Յուքոմով» զբաղվել»,- ասել է Եսայանը։
Նշենք, որ «Յուքոմ»-ի բաժնետոմսերի 29 տոկոսը պատկանում է «ԱյՅու Թելեքոմյունիքեյթ» ընկերությանը, Ֆինանսների նախկին նախարար, այժմ կալանավորված Գագիկ Խաչատրյանի որդիներին: Գուրգեն և Արտյոմ Խաչատրյաններից յուրաքանչյուրը տնօրինում է 11,9 տոկոս բաժնեմասը, նրանց ընտանիքի մեկ այլ անդամ՝ Արամ Խաչատրյանը՝ 24 տոկոսը, մնացած բաժնեմասերից 10 տոկոսը պատկանում է ռուսաստանաբնակ գործարար Սամվել Կարապետյանի «Ֆորա-բանկ»-ին, 6 տոկոսը՝ Կարապետյանի քրոջ ամուսնուն՝ Սուրիկ Պողոսյանին, մոտ 6 տոկոսն էլ՝ Հայկ և Ալեքսանդր Եսայան եղբայրներին։ «ԱյՅու Թելեքոմյունիքեյթ» ընկերության բաժնեմասերը ևս պատկանում են Խաչատրյաններին։
Նարեկ Կիրակոսյան
