Ի՞նչ իրավիճակ է Մարալիկում  մուտքի և ելքի սահմանափակման հատուկ ռեժիմի պայմաններում.. ԼՈՒՍԱՆԿԱՐՆԵՐ

Շիրակի մարզում վերջին օրերին կորոնավիրուսով վարակման  դեպքեր գրանցվեցին Մարալիկ համայնքում։

Հիշեցնենք, որ այստեղ կորոնավիրուսից մահվան 2 դեպք է գրանցվել։ Ավելի վաղ մահացել էր 68-ամյա մի տղամարդ, նախօրեին էլ՝ 90-ամյա տղամարդ: Նրանք նաև մի շարք ուղեկցող հիվանդություններ ունեին։

Միաժամանակ, կորոնավիրուս է հաստատվել Մարալիկի առողջության կենտրոնի 19 աշխատակցի մոտ:

Ստեղծված իրավիճակից ելնելով՝ ՀՀ պարետ Տիգրան Ավինյանի որոշմամբ՝ ապրիլի 19-ից 25-ը Շիրակի մարզի Անի համայնքի Մարալիկ ու Ձորակապ բնակավայրերում սահմանված է վարչական սահման մուտք գործելու ու ելք կատարելու հատուկ ռեժիմ. արգելվում է անձանց ու տրանսպորտային միջոցների մուտքն ու ելքը՝ որոշ բացառություններով։

Factor.am-ի հետ զրույցում Անի խոշորացված համայնքի ղեկավար Արտակ Գևորգյանն ասաց, որ ոստիկանությունն ու հատուկ ծառայությունները կատարում են իրենց աշխատանքը, կան անցակետեր, մարդկանց շարժն իրականացվում է անցագրերով, բնակչությունն էլ հետևում է սահմանված ռեժիմին։

«Մարդիկ պասիվ են, ինքնամեկուսացած։ Բնական է՝ մարդիկ այս հարցի մասին գիտեն, ունեին անհանգստություններ, ուղղակի կարգ ու կանոնի ռեժիմի սահմանններում են գործում»,- ասաց Արտակ Գևորգյանը։

Նրա խոսքով՝ ովքեր հողատարածք ունեն, զբաղվում են գյուղատնտեսական աշխատանքներով, օրենքը դա թույլատրում է։ Միայն Մարալիկում, ըստ համայնքի ղեկավարի, 1.800 հա մշակովի վարելահող կա, Ձորակապում՝ 600-700 հա։

«Թեպետ երեկ կիրակի էր, մարդիկ աշխատել են: Քաղաքացիները, որոնք դաշտավարության աշխատանք ունեն, ինտենսիվ սեզոն է՝ վարի, ցանքի, կուլտիվացիայի աշխատանքներ են իրականացնում: Համապատասխան թույլտվությունները տրվել են, որպեսզի մարդիկ կարողանան գյուղատնտեսական աշխատանքները կատարել, իհարկե՝ օրենքով սահմանված կարգով»,- ասաց Արտակ Գևորգյանը:

Նա հավելեց, որ քաղաքում ընթացքի մեջ են նաև բազմաբնակարան բնակելի շենքերի ախտահանման աշխատանքները։

«Այնպես որ՝ ո՛չ փորձում ենք ձախողել գյուղատնտեսական աշխատանքները, ո՛չ մարդկանց մոտ խուճապ առաջացնել: Նաև ապահովում ենք համապատասխան  քլորացման, ախտահանման աշխատանքները»,- ասաց Անի համայնքի ղեկավարը։

Մեր զրուցակիցը նաև նշեց, որ Մարալիկում կորոնավիրուսով վարակման նոր դեպքերի մասին տեղեկություն չունի։

Էմմա Չոբանյան