07.08.2026 | 11:22
Այսօր ամոթի օր է․ Մարիաննա Ղահրամանյան. ՏԵՍԱՆՅՈՒԹ
Մարալիկում կորոնավիրուսով վարակված 90-ամյա տղամարդ է մահացել
19.04.2020 | 18:39
Շիրակի մարզի Մարալիկ քաղաքում երեկ գիշերը կորոնավիրուսով վարակված 90-ամյա տղամարդ է մահացել։ Լուրը Factor.am-ի հետ զրույցում հաստատեց Շիրակի մարզպետ Տիգրան Պետրոսյանը։
«Տղամարդը երեկոյան նմուշառվել է, մահից մոտ մեկ ժամ առաջ եկել է պատասխանը, որ իր մոտ կորոնավիրուսային հիվանդություն կա»,- ասաց Պետրոսյանը։
Մարզպետի խոսքով՝ 90-ամյա տղամարդը նաև ուղեկցող հիվանդություններ է ունեցել, ժամանակին էլ հոսպիտալացումից հրաժարվել է։
Մարալիկի քաղաքապետ Արտակ Գևորգյանն էլ Factor.am-ին փոխանցեց, որ տղամարդուն այսօր հուղարկավորել են։
«Իմ կողմից կատարվել են բոլոր կարգի գործողությունները՝ տարածքի ախտահանման, զգուշավորության սահմաններում, ըստ նորմերի ու կարգուկանոնի՝ հուղարկավորման կազմակերպման»,- եզրափակեց Մարալիկի քաղաքապետը։
Հավելենք, որ ՀՀ փոխվարչապետ, պարետ Տիգրան Ավինյանի որոշման համաձայն՝ մինչև ապրիլի 25-ը սահմանվել է Շիրակի մարզի Անի համայնքի Մարալիկ և Ձորակապ բնակավայրերի վարչական սահման մուտք գործելու և վարչական սահմաններից ելք կատարելու հատուկ ռեժիմ` արգելելով անձանց և տրանսպորտային միջոցների մուտքն ու ելքը՝ որոշ բացառություններով։
Նելլի Մելքոնյան
