Քաղաքացին ահազանգում է՝ հաշվի վրա կալանք կա, կառավարության հինգերորդ ծրագրով փոխանցված գումարը չի կարողանում ստանալ

Factor.am-ի խմբագրությանն է դիմել սննդի արտադրությամբ զբաղվող փոքր ընկերության սեփականատեր Արշակ Կարապետյանը։

Նա նշեց, որ դիմել է կառավարության առաջարկած ծրագրերից մեկին, գումարը փոխանցվել է իր հաշվին, սակայն երբ գնացել է բանկ այն ստանալու, իրեն ասել են, որ հաշվի վրա կալանք կա, ուստի գումարը չեն կարող իրեն տրամադրել։ Նա նաև ասաց, որ չգիտի, թե ինչի համար է կալանք դրվել իր հաշվին:

«Վարչապետն ասում է այդ գումարը չեն կարող գանձել, ես գնում եմ բանկ, ինձ ուղարկում են ՊԵԿ, ՊԵԿ-ից ուղարկում են հարկադիր, հարկադիրից կրկին բանկ։ Ես չեմ հասկանում, եթե այդ գումարը գանձման ենթակա չէ, ինչու չեն տալիս գումարը։ Հիմա իմ աշխատակիցները գումար են ինձնից պահանջում, բայց դա ինձ վերցնել թույլ չեն տալիս, ի՞նչ պիտի անեմ»,- մտահոգված նշեց մեր զրուցակիցը, որի ընկերությունն ունի երկու աշխատակից։

Քաղաքացու ահազանգի հետ կապված դիմեցինք ԴԱՀԿ։ Հարկադիր կատարումն ապահովող ծառայությունից Factor.am-ին փոխանցեցին, որ խնդիրը Ծառայության ուշադրության կենտրոնում է, զգուշացրել են բռնագանձում չանել, մինչև առաջիկայում  Կառավարության կողմից աջակցության այդ ծրագրի շահառուների մասով ևս հարցի լուծման իրավական կողմը ապահովելը։

Նշենք, որ նմանատիպ խնդիրների մասին ԱԺ-ում բարձրաձայնել էր նաև պատգամավոր Արման Աբովյանը։ Նա, մասնավորապես, ասել էր, թե շատ քաղաքացիների ֆինանսական միջոցների վրա ԴԱՀԿ-ի կողմից արգելանք է դրված և առաջարկել որոշ մասի համար արգելանքը հանել:

Ի պատասխան արդարադատության նախարար Ռուստամ Բադասյանն ասել էր․ «Ճանապարհային ոստիկանության և, այսպես կոչված, կարմիր գծերի ակտերով հարուցված վարչական վարույթների դեպքում արգելանք չի դրվելու արտակարգ դրության ամբողջ ժամանակահատվածում»։

Նախարարը նաև նշել էր, որ պատրաստ են այլ լուծումներ ևս քննարկել։

Լիլիթ Շաբոյան