30.04.2026 | 10:39
Նավթի գներն աճել են
Մարալիկի հիվանդանոցի 9 բուժաշխատողի մոտ կորոնավիրուս է հայտնաբերվել. համայնքում, ընդհանուր առմամբ, արձանագրվել է 11 դեպք
16.04.2020 | 13:02
Մարալիկի առողջության կենտրոնի 9 բուժաշխատողի մոտ կորոնավիրուս է հայտնաբերվել։ Այս մասին Factor.am-ի հետ զրույցում ասաց Անի խոշորացված համայնքի ղեկավար Արտակ Գևորգյանը։
«Մեր ունեցած տեղեկություններով՝ 9 բուժաշխատողի մոտ դրական արդյունք է արձանագրվել, ինչի հետ կապված մեկուսացման գործողություններ են կիրառվել: Գուցե կասկածների կամ խնդիրների դեպքում փորձ արվի կրկնակի ախտորոշման, որովհետև նրանք առողջական դժգոհություններ չեն ունեցել և չեն էլ կասկածել , որ հնարավոր է՝ իրենց մոտ ինչ-որ խնդիրներ կան»,- ասաց Արտակ Գևորգյանը։
Հիվանդները տեղափոխվել են Գյումրու ինֆեկցիոն հիվանդանոց, որը զբաղվում է կորոնավիրուսով հիվանդների բուժմամբ։ Վարակվածների թվում է նաև առողջության կենտրոնի գլխավոր բժշկուհին։
Բուժաշխատողների վարակման աղբյուրն առայժմ պարզ չէ։
«Բոլորիս մտահոգում է այս ցուցանիշը, քանի որ բուժաշխատողների հետ է կապված: Իրենց շփման շրջանակները տարբեր են, հետևաբար՝ կանխարգելելու ու հետագա տարածումը սահմանափակելու համար շատ կարևոր է այդ հարցերի, վարակի աղբյուրի ուսումնասիրությունը»,- ասաց Անի համայնքի ղեկավարը։
Վարակի տարածումը կանխարգելելու համար, ըստ մեր զրուցակցի, համայնքում մշտապես կատարվում են ախտահանման աշխատանքներ։
«Մենք մշտապես փորձում ենք ամեն օր կատարել բազմաբնակարան շենքերի շքամուտքերի և աստիճանավանդակների ախտահանում, նաև քաղաքի մարդաշատ վայրերում, տարբեր հատվածներում։ Գյուղերում, որոնք ունեն ռիսկայնություն և շատ շարժ կա այնտեղ, նույնպես կատարվում են ախտահանման աշխատանքներ քլորաջրով ավտոցիստերնի միջոցով»,- ասաց Արտակ Գևորգյանը։
Նշենք, որ Մարալիկում, ընդհանուր առմամբ, արձանագրվել է կորոնավիրուսով վարակման 11 դեպք։ Ավելի վաղ կորոնավիրուսից մարալիկցի 68-ամյա տղամարդ էր մահացել, որից հետո էլ հայտնաբերվել էր ևս մեկ դեպք։
Էմմա Չոբանյան
