Բանկային գաղտնիքը թուլացել է․ ի՞նչի պետք է պետությունը տեսնի՝ մարդու հաշիվներում ինչ կա․ Մարուքյան. ՏԵՍԱՆՅՈՒԹ

Գործող իշխանությունները, քաղաքական թիմը զրոյական հարգանք է ցուցաբերում մարդու անձնական տիրույթին: Խոսքը բանկային գաղտնիքի մասին է. այս մասին Ազգային ժողովում ՀՀ կենտրոնական բանկի նախագահի ընտրության հարցի քննարկման ժամանակ ասաց «Լուսավոր Հայաստան» խմբակցության ղեկավար Էդմոն Մարուքյանը։

«Նախկին իշխանություններն ապօրինի ձևով էին իմանում․ ով բանկում, ինչքան փող ունի, ինչքան արժեթուղթ ունի, այսօրվա իշխանությունը չի ուզում ապօրինություն անել, ընդունում է օրենքներ, որ այն ինչ ապօրինի պետք է աներ, օրենքով անի: ԿԲ-ն՝ որպես ֆինանսական ոլորտում կարծիք արտահայտող ինստիտուտ, ինչպե՞ս է պահելու բանկային գաղտնիքը, ինչպե՞ս է ներդրողներին համոզելու, որ Հայաստանում անվտանգ է ներդրում անելը, ներդրումների գաղտնիքը պահպանված է»,- ԿԲ նախագահի թեկնածուին հարց ուղղեց Մարուքյանը:

Մարտին Գալստյանը նշեց, որ պատգամավորի ասածների մեջ որոշ մտքեր իր պատասխանելու տիրույթում չեն և պետք է դիմել իրավապահ մարմիններին: Գալստյանը պարզաբանեց, որ ԱԺ-ում ընդունված օրենքով, իր տեղեկություններով, բանկային գաղտնիքի բացահայտման համար կան հստակ ֆիլտրեր և դա արվում է դատարանի միջոցով:

«Անընդհատ երբ խոսում ենք բանկային գաղտնիքի թուլացման մասին, դա ավելի շատ վնաս է տալիս, պետք չէ խոսել բանկային գաղտնիքի թուլացման մասին, եթե դե ֆակտո այդտեղ կան ֆիլտրեր և իրավակարգավորումը ներառող կոնկրետ շրջանակ»,- նշեց Գալստյանը։

Էդմոն Մարուքյանն էլ արձագանքեց․ «Ձեր պատասխանը ինձ հիշեցրեց նախկին վարչապետ Տիգրան Սարգսյանին, որն ասում էր պետք չէ այդքան ասել տնտեսական ճգնաժամ»։

Մանրամասները՝ տեսանյութում։