17.11.2024 | 23:31
Պաշտոնանկություններ կառավարությունում․ 2 նախարար, ուժային կառույցների ղեկավարներ ու ՊԵԿ նախագահն ազատման դիմում են ներկայացրել
Ինչպե՞ս է իրականացվելու օրական մինչև 1.000 թեստավորում, արդյո՞ք առկա է համապատասխան ռեսուրս
09.04.2020 | 23:32
Մենք վաղվանից օրը հազար թեստի հնարավորություն պետք է ստեղծենք, այսօր խորհրդակցություն ենք ունեցել, և առաջին փուլում հնարավոր է, որ այս թեստերի թիվը հազարի չհասնի: Քննարկումների արդյունքում եկել ենք եզրահանգման, որ ցուցումով պետք է լինի թեստավորումը, սակայն բուժաշխատողները, թոքաբորբով հիվանդ քաղաքացիները պարտադիր պետք է թեստավորվեն: Այս մասին այսօր Կառավարության նիստի ժամանակ ասաց ՀՀ վարչապետ Նիկոլ Փաշինյանը:
Օրական կտրվածքով կորոնավիրուսն ախտորոշող հազար թեստ իրականացնելու համար պահանջվում է կադրերի և սարքավորումների հագեցվածություն: Մեր տեղեկություններով՝ սկզբնական շրջանում «Նորք» ինֆեկցիոն կլինիկական հիվանդանոցում և Հիվանդությունների վերահսկման կանխարգելման կենտրոնում եղել է թեստի մեկական սարքավորում, որոնցից յուրաքանչյուրը միաժամանակ կարող է տրամադրել 34 թեստի պատասխան: Յուրաքանչյուր խմբաքանակի պատասխանը ստանալու համար անհրաժեշտ է 5 ժամ:
Factor.am-ն ՀՀ Առողջապահության նախարարության խոսնակ Ալինա Նիկողոսյանից հետաքրքրվեց՝ կա՞ն, արդյոք, անհրաժեշտ թվով սարքավորումներ և լարբորատորիաներ, որպեսզի հնարավոր լինի ապահովել օրական հազար թեստի իրականացումը:
«Այս պահին չեմ կարող ասել, քանի որ հարցը կարգավորման փուլում է: Որտեղ լաբորատոր պայմանները կան, այդ տեղերում սկսելու են անել: Եթե սարքավորումների անհրաժեշտ թվաքանակ չունենայինք, ինչպե՞ս էր վարչապետը հայտնելու»,- ասաց նա:
Մեր տեղեկություններով՝ թեստավորումներ իրականացվելու են նաև «Դավիդյանց լաբորատորիաներ» ՍՊԸ-ում: Այս լաբորատորիան մասնաճյուղեր ունի Երևանում, Գյումրիում, Վանաձորում և Ստեփանակերտում: Ընկերությունը պատկանում է «Նորք» ինֆեկցիոն կլինիկական հիվանդանոցի տնօրեն Մհեր Դավիդյանցին:
Ալինա Նիկողոսյանից հետաքրքրվեցինք՝ արդյո՞ք այս լաբորատորիաներում թեստավորում իրականացվում է և ինչպե՞ս է ինֆեկցիոն հիվանդանոցի տնօրենի եղբոր ընկերությունն ընտրվել:
«Դա ի՞նչ կապ ունի: Որ լաբորատորիաները ունեն հնարավորություններ, այնտեղ է արվելու: Ես այս պահին ցանկը չունեմ, չեմ կարող ասել՝ «Դավիդյանցում» արվելո՞ւ է, թե՞ ոչ»,- ասաց նա:
Հիշեցնենք, որ երեկ Չինաստանից Հայաստան է ներկրվել կորոնովիրուսն ախտորոշող 60 հազար թեստ, բժշկական դիմակներ և շնչառական սարքավորումներ:
Նարեկ Կիրակոսյան
