Քոչարյանը դատի է տվել Փաշինյանին. նա 2 մլն դրամ փոխհատուցում է պահանջում

ՀՀ երկրորդ նախագահ Ռոբերտ Քոչարյանը կրկին դատի է տվել վարչապետ Նիկոլ Փաշինյանին: Այս մասին տեղեկանում ենք Դատական տեղեկատվական համակարգից:

Քոչարյանը հայց է ներկայացրել դատարան՝ հրապարակայնորեն արտահայտված զրպարտությունից պատիվը և արժանապատվությունը պաշտպանելու պահանջի մասին: Հայցը ներկայացվել է ապրիլի 3-ին և մակագրվել Երևան քաղաքի ընդհանուր իրավասության դատարանի դատավոր Տիգրան Գրիգորյանին։

Ռոբերտ Քոչարյանի ներկայացուցիչ Հայկ Ալումյանը «Հայկական ժամանակ»-ին ասել է, որ դատարանից նաև 2 միլիոն դրամ փոխհատուցում են պահանջում: Ալումյանն ասել է՝ հայցի պատճառը չհավասարակշռված և անմեղության կանխավարկածը խախտող հայտարարություններն են, որոնք, ըստ նրա, արել է վարչապետը։

«Հանրաքվեի քարոզարշավի շրջանակում 3 տարբեր հայտարարություններ է արել»,- ասել է փաստաբանը:

Հայցվորի ներկայացուցիչը, սակայն, այլ մանրամասներ չի նշել՝ ասելով միայն, որ այն կապված է վարչապետի՝ 2.4 միլիարդ դոլարով պաշտպանության բյուջեն ավելացնելու հայտարարության հետ:

Հիշեցնենք, որ մարտի 11-ին Շինուհայրում Նիկոլ Փաշինյանը հիշեցրել էր 2018-ի խորհրդարանական ընտրությունների ժամանակ տված խոստումը՝ 5 տարում 2.5 միլիարդ գումար ավելին ծախսել բանակի մարտունակության բարձրացման համար, և այդ 2.5 միլիարդից 1.2-ը առնվազն պետք է հակակոռուպցիոն պայքարով վերադարձված փողերը լինեն:

«Այդ փողերը Սերժ Սարգսյանի մոտ են և նրա ընտանիքի, Ռոբերտ Քոչարյանի մոտ են և նրա ընտանիքի, Գագիկ Խաչատրյանի մոտ են և նրա ընտանիքի և մյուսների: Թող բերեն ու վերադարձնեն»,- հայտարարել էր Փաշինյանը։

Հավելենք, որ Ռոբերտ Քոչարյանը երկրորդ անգամ է դատի տալիս Նիկոլ Փաշինյանին: Երևան քաղաքի դատարանի դատավոր Լիլիթ Սարգսյանի որոշմամբ՝ առաջին գործի վարույթը կարճվել էր՝ հայցվորի կողմից հայցից հրաժարվելու հիմքով։