20.01.2026 | 18:10
Հայաստանի և Ադրբեջանի համատեղ ջանքերով կհասնենք հավերժական խաղաղության Կովկասում. սա է մեր նպատակը. Ալիև
Պայթյուն Արարատի մարզում՝ Նախիջևանի սահմանին. 33-ամյա կնոջ ոտքն անդամահատել են
06.04.2020 | 15:50
Արարատի մարզի Պարույր Սևակ համայնքի տարածքում ապրիլի 5-ին արտակարգ դեպք է տեղի ունեցել. Նախիջևանի սահմանի մոտ ականի պայթյունից երիտասարդ կին է վիրավորվել: Այս մասին Factor.am-ի հետ զրույցում ասաց համայնքի ղեկավար Էդուարդ Ստեփանյանը:
«Ջահել կին է՝ 33 տարեկան, մի քանի հոգու հետ բանջար հավաքելու է գնացել: Հասել են մինչև Նախիջևանի սահման, գյուղից շատ հեռու է, պաշտպանական գոտի է, որտեղ քաղաքացիական անձանց մուտքը խստիվ արգելվում է: Հիմա լավ է, փորձում են բուժել: Մեկ ոտքը վիրահատել են, մյուսն էլ այսօր են անելու: Մեկ ոտքն անդամահատվել է»,- ասաց գյուղապետը:
Նա նշեց, որ շատ մեծ դժվարությամբ են կնոջը դուրս բերել դեպքի վայրից, քանի որ տարածքն ականապատ է: Գյուղապետի փոխանցմամբ՝ սահմանապահները տարածքում են եղել, սակայն չկարողացավ մեկնաբանել՝ այդ դեպքում ինչպե՞ս է կինը կարողացել մուտք գործել արգելված տարածք:
«Աստղիկ» ԲԿ-ից էլ, ուր տեղափոխել են վիրավոր կնոջը, Factor.am-ին փոխանցեցին, որ հիվանդի վիճակը կայուն է, բայց գտնվում է վերակենդանացման բաժանմունքում:
«Գիտակցությունը տեղն է, արդեն արթնացել է, ոտքը փրկել չի հաջողվել, քանի որ ամբողջովին ջնջխվել է, կատարվել է անդամահատում»,- ասաց ԲԿ-ի փոխտնօրեն Արշակ Մնացականյանը:
Ոստիկանության տեղեկացմամբ՝ ապրիլի 5-ին ժամը 14:50-ին հիվանդանոցից Ոստիկանության Արարատի բաժին հաղորդում է ստացվել, որ «ձախ ստորին վերջույթի, ստորին ս/3-ի մակարդակի վնասվածքային ամպուտացիա, հեմորակիկ և վնասվածքային շոկ 4-րդ աստիճանի կոմոստրոս վիճակ» ախտորոշմամբ իրենց մոտ է տեղափոխվել Պ.Սևակ գյուղի 1987թ.ծնված բնակչուհի: Մեկնած օպերատիվ խումբը պարզել է, որ նույն օրը ժ.13.20-ի սահմաններում, սկեսրոջ հետ Պարույր Սևակ գյուղի վարչական տարածքում բանջար հավաքելու ժամանակ, նրա ոտքը պատահաբար դիպել է ականի, որի հետևանքով տեղի է ունեցել պայթյուն, և վերջինս ստացել է նշված վնասվածքը: Հանգամանքները պարզվում են: Նախապատրաստվում են նյութեր:
Նարեկ Կիրակոսյան
