18.10.2026 | 11:20
Կոտայքի մարզի Առինջ բնակավայրում գործարկվելու են էլեկտրաշչակներ
18 հազար վարակակիր ու 356 մահ ունեցող Թուրքիայում դեռ կարանտին չկա․ Ստամբուլից պատմում են տեղաբնակները. ՏԵՍԱՆՅՈՒԹ
Քաղաքականություն
03.04.2020 | 18:26
18 հազարից ավելի վարակակիր ու 356 մահ ունեցող Թուրքիայում կորոնավիրուսը դեռ պետական մակարդակով կտրուկ քայլեր անելու առիթ չի դարձել։ Տնտեսական կորուստների ռիսկերը մատնանշելով՝ նախագահ Էրդողանն այդպես էլ մինչ օրս երկրում պարտադիր ինքնամեկուսացման մասին չի հայտարարել։
Թուրքիայում կորոնավիրուսի դեմ դեռ պայքարում են քաղաքացիական պատասխանատվության հաշվին։ Ստամբուլում բնակվող, ազգությամբ թուրք Շահան Դոանը պատմում է․ իրենց մոտ այժմ մզկիթներում մեծ խմբով նամազ անելն արգելվում է: Սրճարաններն ու առևտրի կենտրոնները փակ են. «Մարդկանց 70%—ը տանն է։ Դուրս են գալիս միայն սնունդ գնելու, դեղատուն կամ բժշկի գնալու նպատակով։ Խանութներում մեծ հերթեր չկան, սակայն մարդիկ գնում են ավելին, քան պետք է։ Այդպես են անում, որովհետև գուցե հետո պարետային ժամ հայտարարվի։ Տանից դուրս գալու համար այժմ թույլտվություն պետք չէ։ Կարիք չկա հատուկ փաստաթուղթ ունենալ։ Եթե ուզում ես, կարող ես դուրս գալ։ Սակայն, ամեն դեպքում, մեզ հորդորում են տանը մնալ»։
Շահանն ասում է, որ Ստամբուլի դեղատներում վերջին շրջանում թանկացումներ է նկատել․ «Դեղատներում անհրաժեշտ պարագաների պակաս չկա։ Խնդիրն ավելի շատ կապված է թանկացումների հետ։ Օրինակ՝ պաշտպանիչ բժշկական դիմակն առաջ 1 լիրա էր, իսկ հիմա՝ 5-10 լիրա։ Նույն կերպ թանկացել է նախ ախտահանիչների գինը»։
Նոր կորոնավիրուսի պատճառով Թուրքիայում շուրջ 400 հազար բիզնես դադարեցրել է գործունեությունը` առանց աշխատանքի թողնելով 2 միլիոնից ավելի մարդու։ Մարտի 21-ից Թուրքիան դադարեցրել է օդային հաղորդակցությունը 68 երկրի հետ։ Այն նաև փակել է իր սահմանները Հունաստանի ու Բուլղարիայի հետ։ Երկրում դադարեցված է նաև միջքաղաքային հաղորդակցությունը։
Նախագահ Էրդողանը որոշել է իր 7 ամսվա աշխատավարձը կորոնավիրուսից տուժածներին փոխանցել։ Բացի այդ, երկրում ստեղծվել է Ազգային օգնության արշավ, որի շրջանակում կառավարության անդամներն ու օրենսդիրը 5․2 թուրքական լիրա, այսինքն՝ 791 հազար դոլար են հատկացրել կորոնավիրուսի դեմ պայքարին։ Էրդողանը նշել է, որ արշավի նպատակն է լրացուցիչ աջակցություն տրամադրել վարակից տուժած ցածր եկամուտ ունեցողներին։
Թուրքական առողջապահական համակարգը հասցրել է 125․556 քաղաքացու թեստավորել։ Էրդողանի տեղեկացմամբ՝ ապրիլի 20-ից կորոնավիրուսով հիվանդներին կսպասարկի Ստամբուլի քաղաքային հոսպիտալը, որի տարածքը 1 մլն քմ է և որտեղ 2682 մահճակալ կա։ Էրդողանի համոզմամբ՝ Թուրքիայի առողջապահական համակարգը կորոնավիրուսի դեմ պայքարում լավ է պատրաստված։ Կորոնավիրուսային այս արված իրավիճակում տեղի Շրջակա միջավայրի և ուրբանիզացիայի նախարար Մուրաթ Կուրումն էլ թվիթերում կոչ է արել չմոռանալ նաև թափառող կենդանիների մասին՝ տան առաջ սնունդ ու ջուր թողնելով։
Մանրամասները՝ տեսանյութում։
Նելլի Մելքոնյան
