Այս իրավիճակում պետք է գազային խնդրից տրանսֆորմացվենք դեպի էներգիայի այլ աղբյուրներ. Թևան Պողոսյանը՝ գազի սակագնի բարձրացման հնարավորության մասին

Մենք պետք է պարզապես կարողանանք հասկանալ, որ աշխարհի բոլոր երկրներն առաջնորդվում են իրենց շահերով, Ռուսաստանը՝ նույնպես, և իր շահերից է բխում բնական գազի սակագնի բարձրացումը: Factor.am-ի հետ զրույցում անդրադառնալով գազի սակագինը բարձրացնելու առաջարկով ՀԾԿՀ դիմելու՝ «Գազպրոմ Արմենիա» ընկերության մտադրությանը՝ ասաց Մարդկային զարգացման միջազգային կենտրոնի ղեկավար, քաղաքագետ Թևան Պողոսյանը:

«Ինչքան բարձր՝ այնքան լավ, որովհետև իր տնտեսությունն էլ է վնասվում այս իրավիճակում: Բայց մենք էլ պետք է առաջնորդվենք մեր շահերով, և բանակցությունների ժամանակ կարողանանք այնպիսի առաջարկներ անել, որոնք երկկողմանի շահավետ լինեն: Որպեսզի Ռուսաստանն իր շահերը ոտնահարված չհամարի, դրա հետ մեկտեղ՝ բավարարվեն հայկական շահերը»,- ասաց նա:

Թևան Պողոսյանի կարծիքով՝ Հայաստանը պետք է կարողանա նաև այլ մեխանիզմներ մշակել, որպեսզի գազային խնդրից տրանսֆորմացվենք դեպի էներգիայի այլ աղբյուրներ:

«Հնարավոր է՝ մեր հայկական գիտական միտքը կարողանա նպաստել՝ հասկանալու, թե ինչպես կարող ենք տրանսֆորմացվել գազային խնդիրներից դեպի հոսանք, արևային, ջրային էներգետիկա: Պետք է կարողանանք հասնել այն մակարդակի, որ երբ մեկը մեզ գազի գին առաջարկի, այնպիսի առաջարկ անի, որը բոլորիս հետաքրքիր լինի: Հատկապես պանդեմիայից հետո ունենք մի իրավիճակ, երբ տնտեսական հարաբերությունները շատ են փոխվելու: Ինչ չունենք, բայց մեզ պետք է, ստիպված գնելու ենք, բայց ինչը կարող ենք ստեղծել, պետք է ստեղծենք ինքներս»,- նշեց նա:

Գլոբալիզացիայի և տարածաշրջանային համագործակցության կենտրոնի ղեկավար, քաղաքագետ Ստեփան Գրիգորյանն իր հերթին գազի սակագնի բարձրացման նախաձեռնությունը համարում է եվրասիական տարածաշրջանի ինտեգրացիոն միավորումների անդամներին ստրկացնելու փորձ՝ Ռուսաստանի կողմից:

Նրա խոսքով՝ կորոնավիրուսի տարածման հետևանքով ստեղծված իրավիճակում, օրինակ, Եվրամիությունը փորձում է աջակցություն ցուցաբերել կառույցի անդամ այն երկրներին, որոնք դրա կարիքն ամենաշատն ունեն՝ Իտալիա, Իսպանիա և այլն: Իսկ ԵՏՄ-ում այդ համերաշխությունը քաղաքագետը, ցավով նշում է, չկա:

«Նավթի գինն ակնհայտորեն անկում է ապրում, և մենք գիտենք, որ գազի գինը միայն շուկայով չի որոշվում, այլ կապված է նաև նավթի գնի հետ: Սակայն «Գազպրոմ»-ը հիմա լկտի ձևով մեր կառավարությանն առաջարկում է բարձրացնել գազի գինը՝ իջեցնելու փոխարեն: Ուղղակի երբ մտնում էինք ԵՏՄ, պետք է մտածեինք՝ ինչո՞ւ էինք մտնում»,- ասաց Ստեփան Գրիգորյանը:

Նա, ամեն դեպքում, հույս հայտնեց, որ Հայաստանի Կառավարությանը ռուսական կողմի հետ բանակցություններում կհաջողվի հաջողություն արձանագրել սակագնի իջեցման հարցում. նման բանակցությունների մասին հայկական կողմը հայտնել է օրերս:

Հիշեցնենք, որ ռուսական գազի բարձր սակագնի և համաշխարհային իրավիճակին դրա անհամապատասխանության խնդրին օրերս կայացած հեռախոսազրույցում անդրադարձել էին նաև Հայաստանի վարչապետ Նիկոլ Փաշինյանն ու Բելառուսի նախագահ Ալեքսանդր Լուկաշենկոն: