Ինչ են քննարկել Փաշինյանն ու Լուկաշենկոն. Երեւանի եւ Մինսկի հայտարարությունները տարբերվում են միմյանցից

Այսօր Հայաստանի վարչապետ Նիկոլ Փաշինյանի եւ Բելառուսի նախագահ Ալեքսանդր Լուկաշենկոյի միջեւ հայկական կողմի նախաձեռնությամբ հեռախոսազրույց է տեղի ունեցել: Այնուհետ, երկու երկրների ղեկավարների աշխատակազմերը տարածել են հաղորդագրություններ, որոնց բովանդակությունները զգալիորեն տարբերվում են միմյանցից:

Հայկական կողմը հեռախոսազանգի վերաբերյալ տեղեկատվության հարցում խիստ սահմանափակ է եղել: Միայն նշել են, որ զրուցակիցները տեղեկատվություն են փոխանակել Հայաստանում և Բելառուսում Covid-19 վիրուսի տարածման հետևանքով ստեղծված համաճարակային իրավիճակի և կառավարությունների կողմից այդ կապակցությամբ ձեռնարկվող միջոցառումների վերաբերյալ:
«Կողմերը քննարկել են նաև ստեղծված իրավիճակում Եվրասիական տնտեսական միության շրջանակում փոխգործակցությանն առնչվող հարցեր: Երկուստեք ընդգծվել է պարբերական կոնսուլտացիաների և համատեղ գործողությունների անհրաժեշտությունը»,- ասված է հայկական կողմի տարածած հաղորդագրության մեջ:

Իսկ ահա բելառուսական կողմի հաղորդագրության մեջ նշվում է, որ քննարկվել են նաեւ գազի գնի վերաբերյալ հարցեր․ այս դրվագը, սակայն, բացակայում է ՀՀ վարչապետի աշխատակազմի տարածած տեղեկատվության մեջ: «Ալեքսանդր Լուկաշենկոն ու Նիկոլ Փաշինյանը շեշտել են բնական գազի գնի բարձր մակարդակը՝ նշելով, որ այն չի համապատասխանում համաշխարհային մակարդակին և ստեղծված իրավիճակին ընդհանրապես»,- նշված է Բելառուսի նախագահի մամուլի ծառայության հաղորդագրությունում:

Factor.am-ը ՀՀ վարչապետի մամուլի խոսնակ Մանե Գեւորգյանին խնդրեց մեկնաբանել, թե որն է երկու երկրների ղեկավարների աշխատակազմերի կողմից տարածված հաղորդագրություններում առկա էական տարբերությունների պատճառը: Մասնավորապես, ինչու՞ հայկական կողմը չի նշել գազի գնի քննարկման մասին:
«Ոչ մի բանով պայմանավորված չի, դա իրենց մեկնաբանությունն է տեղ գտել իրենց հաղորդագրության մեջ: Մենք էլ տարածել ենք մեր հաղորդագրությունը, որին այս պահին ավելացնելու բան չունենք: Մհեր Գրիգորյանն էլ է գազի գնի հետ կապված նամակ ուղարկել, որը տարածել ենք: Առհասարակ գազի շուրջ խոսակցություններ այս պահին, որպես այդպիսին, չեն ընթանում, բայց գուցե ապագայում լինեն»,- ասաց ՀՀ վարչապետի խոսնակը:

Նարեկ Կիրակոսյան