Իշխանությունն անգործության է մատնված, Բակո Սահակյանը չի կարողանում որոշումներ կայացնել․ Հայկ Խանումյան. ՏԵՍԱՆՅՈՒԹ

Արցախի նախագահի թեկնածու Հայկ Խանումյանը քվեարկել է Ստեփանակերտի 1/32 ընտրատեղամասում։ Ասում է՝ քվեարկել է հանուն իրական փոփոխությունների՝ ունենալու այնպիսի Արցախ, որը պատրաստ է դիմագրավել բոլոր մարտահրավերներին:

«Ինչպես տեսնում եք, ամեն օր նոր մարտահրավերի առջև ենք կանգնում և շատ կարևոր է՝ մեր տնտեսությունը այնպիսին լինի, որ բոլոր ֆորսմաժորային իրավիճակներին կարողանա պատասխան տալ։ Ցավոք սրտի, այս տարիների ընթացքում չենք կարողացել ստեղծել նման պետություն, որն իր ինստիտուտներով ի վիճակի լինի ֆորսմաժորային իրավիճակներից առավել արդյունավետ դուրս գալ»,- ասաց նախագահի թեկնածուն։

Հայկ Խանումյանը կարծում է, որ պետք է որոշում կայացվեր ընտրությունները չեղարկելու կամ հետաձգելու մասին․ «Ինչպես տեսնում ենք, այս անգամ էլ իշխանությունը անգործության է մատնված։ Բակո Սահակյանն ընդհանրապես չի կարողանում որոշումներ կայացնել, դա տեսել ենք 2016 թվականին, դա տեսել ենք հիմա և տարբեր իրավիճակներում՝ 2018 թվի հունիսին, երբ ցույցեր էին Ստեփանակերտում։ Հետևաբար, ամբողջ պատասխանատվությունը Բակո Սահակյանի ու նրա նեղ շրջապատի վրա է»։

Արցախի նախագահի ընդդիմադիր թեկնածուն կարծում է՝ բոլոր թեկնածուների համար ֆորմալ առումով էին հավասար ստեղծված պայմանները, սակայն բավականին մեծ գումար է ծախսվել․ «Աննախադեպ Արցախի պատմության մեջ, և կարծում եմ՝ աննախադեպ Հարավային Կովկասի համար, առնվազն 3 կուսակցություն հսկայական գումար է ծախսել, ունեին շտաբեր բոլոր տեղերում, մեծաթիվ աշխատողներ են ներգրավվել»։

Մանրամասները՝ տեսանյութում: