Նշանակելուց առաջ, թե՞ հետո պետք է հաշվի առնել պաշտոնյայի կարողությունները. հայկական դիվանագիտության առանձնահատկությունները

Նոյեմբերի 3-ին խորհրդարանում լրագրողների հետ զրույցում ՀՀ ԱԳ փոխնախարար Շավարշ Քոչարյանն անդրադարձավ Վրաստանում ՀՀ դեսպան Ռուբեն Սադոյանի նշանակման մասին հարցերին: Լրագրողներին հետաքրքրում էր, թե ինչո՞ւ ենք դիվանագիտության մեջ անփորձ անձին ուղարկում մեզ համար ռազմավարական նշանակություն ունեցող երկիր՝ դեսպան. «Դեսպանի մասին գնահատում են իր կատարած աշխատանքով: Ոչ միայն Հայաստանում, այլև ամբողջ աշխարհում կա այն պրակտիկան, որ դեսպանների նշանակումը քաղաքական է լինում»:

Ինչպես խորհուրդ է տալիս փոխարտգործնախարարը, նորանշանակ դեսպանի աշխատանքը գնահատենք արածով: Ռուբեն Սադոյանը եղել է ԱԺ երկու գումարումների պատգամավոր՝ 2007-17 թվականներին: 10 տարվա գործունեության ընթացքում հանդես է եկել մեկ մամուլի ասուլիսով, այն էլ՝ առաջին անգամ խորհրդարան մտնելու քարոզարշավի ժամանակ: Միակ ասելիքն այն էր, որ քանի որ Արշակ Սադոյանի ընտրատարածքն է ներկայացնելու, նրանից ակտիվ կլինի: Ակտիվությունը դրսևորվեց այնքանով, որ 10 տարվա ընթացքում որևէ անգամ ելույթ չունեցավ ամբիոնից, որևէ օրինագծի քննարկման վերաբերյալ հարց չուղղեց: Երբևէ անգամ դեմ կամ ձեռնպահ չքվեարկեց. նրա բոլոր կոճակսեղմումները եղել են կողմ: Առաջին անգամ ԱԺ մտնելիս ընդամենը մեկ օրինագիծ է համահեղինակել, որն ընդունվել է: Երկրորդ գումարման ընթացքում երկու օրինագիծ է համահեղինակել, որոնց քննարկումը հետաձգվեց, ու այլևս դրանց չանդրադարձան: Անգամ որպես պատգամավոր նրան իր ընտրողները չճանաչեցին, և համացանցում Սադոյանի մասին առկա եզակի տեսանյութերից մեկում երևում է,թե ինչպես են քաղաքացիներրը կասկածում, արդյոք նա պատգամավոր է: Ուստիև՝ Վրաստանում նորանշանակ դեսպանի, և ոչ միայն նրա արածների խիստ համեստ հանրագումարը նկատի ունենալով՝ գուցե ճիշտ կլինի ոչ թե նշանակել ու տեսնել ինչպես է աշխատում, այլ աշխատանքը տեսնելուց հետո՞ նշանակել:

Հ. Գ. Ի դեպ, երեկ լրագրողները փոխարտգործնախարարից հետաքրքրվեցին՝ արդյոք Վրաստանում շները ապահովագրված են՝ այդպիսով ակնարկելով Ռուբեն Սադոյանի՝ թափառող շների մեկուսացման հետ կապված նախկին գործունեությունը: Այս հարցը հարուցեց Շավարշ Քոչարյանի ժպիտը, ով նշեց, թե այդ հարցի պատասխանն իր տիրույթում չէ: