16.03.2026 | 20:10
Մենք գալիս ենք Անկախության հռչակագիրը պահելու. Իշխան Սաղաթելյան. ՏԵՍԱՆՅՈՒԹ
Արցախում մեկնարկել են նախագահի և Ազգային ժողովի ընտրությունները
Քաղաքականություն
31.03.2020 | 08:02
Արցախում մեկնարկել են Հանրապետության նախագահի և Ազգային ժողովի ընտրությունները:
Մարտի 31-ի համապետական ընտրություններին մասնակցում են նախագահի 14 թեկնածուներ, իսկ Ազգային ժողովի ընտրություններին՝ 10 կուսակցություններ և 2 կուսակցությունների դաշինքներ:
Արցախի 228 համայնքների համար գործելու է 8 ընտրական հանձնաժողով՝ Ստեփանակերտ քաղաքում և հանրապետության 7 շրջաններում: Ընդհանուր առմամբ, կազմավորվել է 282 ընտրական տեղամաս, այդ թվում՝ մեկական տեղամաս. Երևանում՝ ՀՀ-ում Արցախի մշտական ներկայացուցչությունում, ևս մեկը՝ Շուշիի քրեակատարողական հիմնարկում:
ԱՀ Ոստիկանության տրամադրված տվյալների համաձայն՝ Արցախի Հանրապետության ընտրողների թիվը կազմում է 103 հազար 663:
Նշենք, որ դիտորդական առաքելություն իրականացնելու համար ԱՀ Կենտրոնական ընտրական հանձնաժողովում նախապես հավատարմագրվել էին 14 հասարակական կազմակերպություններ՝ 807 ներկայացուցիչների ընդգրկմամբ, ինչպես նաև 37 զանգվածային լրատվամիջոցների 197 ներկայացուցիչներ: Սակայն, կորոնավիրուսի տարածման վտանգը հաշվի առնելով և այն կանխելու նպատակով, բազմաթիվ դիտորդներ և մի շարք լրատվամիջոցներ, այդ թվում՝ Factor.am-ը, հայտարարել են Արցախ չմեկնելու որոշում կայացնելու մասին:
Միաժամանակ, ՀՀ Ազգային ժողովի մամուլի ծառայության տեղեկացմամբ՝ Արցախի համապետական ընտրություններին դիտորդական առաքելություն իրականացնելու նպատակով մարտի 30-ից ապրիլի 1-ը Ստեփանակերտ են գործուղվել ԱԺ նախագահի տեղակալ, պատվիրակության ղեկավար Ալեն Սիմոնյանը, Տարածաշրջանային և եվրասիական ինտեգրման հարցերի մշտական հանձնաժողովի հախագահի տեղակալ Արմեն Փամբուխչյանը, Մարդու իրավունքների պաշտպանության և հանրային հարցերի մշտական հանձնաժողովի նախագահի տեղակալ Անի Սամսոնյանը, պատգամավորներ` Համազասպ Դանիելյանը, Սոֆիա Հովսեփյանը, Գևորգ Պապոյանը, Հրաչյա Հակոբյանը, Ռուստամ Բաքոյանը, Սիսակ Գաբրիելյանը, Արտյոմ Ծառուկյանը, Արթուր Դալլաքյանը և Հարություն Բաբայանը:
Հավելենք նաև, որ ԱՀ ԿԸՀ-ն սահմանել է Արցախի Հանրապետության նախագահի և Ազգային ժողովի՝ 2020 թվականի մարտի 31-ի ընտրությունների քվեաթերթիկների նմուշները. Հանրապետության նախագահի ընտրությունների քվեաթերթիկը կլինի վարդագույն (թղթի չափսը` 297մմ x 210մմ), իսկ Ազգային ժողովի ընտրությունների քվեաթերթիկը կունենա սպիտակ գույն (թղթի չափսը` 200 մմ x 420 մմ)` երկու գույնի հատուկ ջրաներկի պաշտպանմամբ:
