Օրավարձից զրկվելուց մինչև կանխավճարի վերադարձ. հարկատու երգիչները պետությունից ակնկալիք ունե՞ն

Հայկական շոու-բիզնեսի ներկայացուցիչները կորոնավիրուսով պայմանավորված արտակարգ դրության պայմաններում մի շարք խնդիրների են բախվել, սակայն այն համոզման են, որ կառավարությունը պետք է աջակցի առավել խոցելի խմբերի, իսկ երգիչ-երգչուհիներն,, օրինակ, ինչպես իրենք են ասում, «մի կերպ յոլլա կգնան»:

Նշենք, որ Հայաստանի վարչապետ Նիկոլ Փաշինյանի գլխավորած կառավարությունը մարտի 30-ին արտահերթ նիստ է հրավիրել հակաճգնաժամային ևս 3 փաթեթներ ընդունելու նպատակով: Ավելի վաղ կառավարությունը քննարկել եւ ընդունել էր ճգնաժամային իրավիճակում գործադրվելիք 5 փաթեթներ: Այսպիսով, ընդունված միջոցառումների թիվը կհասնի 8-ի: Դրանցից 4-ը զուտ տնտեսական աջակցության բնույթ ունեն, 4-ը՝ սոցիալական:

Թաթայի պրոդյուսեր Գրիգոր Նազարյանը Factor.am-ին տեղեկացրեց, որ երգիչը հասցրել է մի շարք համերգներ չեղարկել, այդ թվում՝ հունիսին Երևանում սպասվելիք մեծ մենահամերգը: Պրոդյուսերի խոսքով՝ մեծ մասամբ օրավարձով ապրող երգիչները ստաբիլ եկամուտ չունեն, այս օրերին նրանք, առհասարակ, չեն աշխատում, չեն ստանում աշխատավարձ: Ամեն դեպքում, Գրիգոր Նազարյանը այն համոզման է, որ հարկավոր է սպասել, այս փուլում չարժե կառավարությունից  որևէ ակնկալիքներ ունենալ:

Ազգային, ժողովրդական երգերի կատարող Ներսիկ Իսպիրյանը ևս այս շրջանում բազմաթիվ համերգներ է չեղարկել և հետաձգել, հիմնականում՝ արտերկրում:  Պարոն Իսպիրյանը շեշտեց, որ այս շրջանում ժողովրդին պետք է աջակցություն ցուցաբերեն նաև Հայաստանի եւ սփյուռքի գործարարները. ամեն մեկն ինչով կարող է պետք է օգնի պետությանը ոտքի կանգնել:

Երգիչ Արսեն Սաֆարյանը արտակարգ դրության հայտարարումից հետո դադարեցրել է իր գործունեությունն ակումբներում և, փաստացի, մնացել է գործազուրկ, սակայն նա այն համոզման է, որ այսօր շատ ավելի կարիքավոր խմբեր կան, որոնց կառավարությունը պետք է աջակցություն ցուցաբերի:

Հիշեցնենք, որ կառավարության  որոշմամբ՝ մարտի 16-ից  մինչև ապրիլի 14-ը, այսինքն մեկ ամիս ժամկետով Հայաստանում հայտարարվել է  արտակարգ դրություն՝ նպատակ ունենալով հանրապետությունում խոչընդոտել նոր կորոնավիրուսային հիվանդության (COVID-19) տարածումը։

Մանրամասները՝ տեսանյութում:

Աննա Բաբաջանյան