Factor.am-ի տեղեկություններով կորոնավիրուսով վարակվել են նաև «Հիվանդությունների վերահսկման և կանխարգելման ազգային կենտրոն»-ի համաճարակաբաններ:
Այս տեղեկությունը Factor.am-ի հետ զրույցում հաստատեց նաեւ առողջապահության նախարարի մամուլի խոսնակ Ալինա Նիկողոսյանը: Նա ասաց, որ նրանք «Հիվանդությունների վերահսկման և կանխարգելման ազգային կենտրոն»-ի քաղաքային մասնաճյուղի բժիշկներ են: Մեր տեղեկություններով վարակվել են կենտրոնի ավելի քան 1 տասնյակ բուժաշխատողներ։ Հարցին, թե քանի բժշկի մասին է խոսքն, Ալինա Նիկողոսյանն ասաց, որ իրենք այդ մասին լրացուցիչ հաղորդագրություն կտարածեն:
Նշենք, որ բուժաշխատողների վարակված լինելու մասին նաեւ առողջապահության նախարար Արսեն Թորոսյանն էր հայտնել: Հայաստանում մարտի 29-ին՝ ժամը 11:00-ի դրությամբ կորոնավիրուսով վարակվելու 52 նոր դեպք է գրանցվել: Այս մասին հայտնում է ՀՀ ԱՆ հիվանդությունների և վերահսկման եւ կանխարգելման ազգային կենտրոնը: Բուժվել է ընդհանուր 30 քաղաքացի, փաստացի բուժում է ստանում 391-ը: Գրանցվել է մահացության երեք դեպք։
Հ․ Գ․ Մեր հրապարակումից րոպեներ անց Ան խոսնակը գրառում կատարեց ֆեյսբուքում՝ հայտնելով, որ Հիվանդությունների վերահսկման և կանխարգելման ազգային կենտրոնի քաղաքային մասնաճյուղի 14 աշխատակիցների մոտ հաստատվել է կորոնավիրուսային հիվանդություն:
Նրա փոխանցմամբ՝ վերջիններս նոր դեպքեր չեն, ներառված են եղել մարտի 28-ի վիճակագրության մեջ:
Նարեկ Կիրակոսյան
