Հուսով ենք՝ գարնանը պատվաստանյութի փորձարկումից արդյունքներ կունենանք․ Նուբար Աֆեյան. ՏԵՍԱՆՅՈՒԹ

Մոտ երկու շաբաթ առաջ պատվաստանյութերի փորձարկում ենք սկսել ՝ 45 կամավորի շրջանում։ Դա արել ենք 3 տարբեր դոզավորման խմբերով։ Արդյունքները, բնականաբար, նշանակալի չեն լինի, բայց կդառնան ցուցիչներ՝ հետագա փուլերի համար։ Այս մասին այսօր «COVID-19. առերեսվելով համաշխարհային վախին» թեմայով վեբինարի ընթացքում նշեց «Ավրորա» մարդասիրական նախաձեռնության համահիմնադիր Նուբար Աֆեյանը։

«Կորոնավիրուսի պատվաստանյութի վրա սկսել ենք աշխատել դեռ մինչև COVID-19-ի պանդեմիան։ Հուսով ենք՝ գարնանը պատվաստանյութի փորձարկումից արդյունքներ կունենանք։ Իդեալական սցենարի պարագայում՝ ուշ ամռանը կամ վաղ աշնանը պատվաստանյութի ավելի մեծ փորձարկում կկարողանանք անել։ Մինչ այդ՝ մեծ ներդրումների կարիք կա, ինչն էլ մենք հիմա անում ենք։ Սա մեկ գիշերվա աշխատանք չէ։ Հույս ունենք, որ գոնե ամռանը պատվաստանյութ կունենաք առաջնագծում աշխատող բուժանձնակազմի համար։ Որքան էլ աշխատենք, դժվար կլինի պատվաստանյութով ապահովել ողջ աշխարհին, բայց, ամեն դեպքում, սա ոչ թե մրցակցություն է տարբեր կազմակերպությունների միջև, այլ մրցակցություն՝ մեր և վիրուսի միջև։ Վախենամ՝ սա պարզապես մղձավանջ չէ, որից կարող ենք արթնանալ և ամեն ինչ առաջվանը լինի։ Բայց պետք է հիշել, որ նմանատիպ դեպքերում մարդիկ երեք հիմնական փուլի միջով են անցնում․ փրկվում են, վերածնվում ու բարգավաճում։ Կարծում եմ՝ կորոնավիրուսից պարագայում էլ այդպես կլինի»,- նշեց Նուբար Աֆեյանը։

Մանրամասները՝ տեսանյութում։

Նելլի Մելքոնյան