20.01.2026 | 21:27
Կաթողիկոսը հրավիրել է նաև Փաշինյանին միացած եպիսկոպոսներին. ինչ է քննարկվելու Ավստրիայում. ՏԵՍԱՆՅՈՒԹ
«Էրեբունի պլազա» ներխուժած տղամարդն անմեղսունակ է ճանաչվել․ նրան տեղափոխել են հոգեբուժարան
Հասարակություն
27.03.2020 | 11:56
Հունվարի 23-ին «Էրեբունի պլազա» ներխուժած Արթուր Թորոսյանը, դատահոգեբանական փորձաքննության եզրակացության համաձայն, ճանաչվել է անմեղսունակ և չի կարող մասնակցել դատաքննաչական գործողություններին։ Այս մասին Factor.am—ի հետ զրույցում հայտնեց Արթուր Թորոսանի պաշտպան Էդուարդ Աղաջանյանը։
«Նա տառապել և տառապում է պարանոիդ շիզոֆրենիա հիվանդությամբ։ Քննիչի որոշմամբ՝ նրա նկատմամբ խափանման միջոցը վերացվել է, իսկ դատարանի որոշմամբ՝ ընտրվել անվտանգության միջոց, և նա տեղափոխվել է Նուբարաշենի հոգեբուժարան»,- ասաց Աղաջանյանը։
Նրա խոսքով՝ Քրեական դատավարության օրենսգրքով սահմանված կարգով՝ Արթուր Թորոսյանի նկատմամբ քրեական հետապնդումը դադարեցվեու է։ «Ինքն անմեղսունակ է և ենթակա չէ քրեական պատասխանատվության։ Դրանից հետո գործը հատուկ վարույթի կարգով ուղարկվելու է դատարան, որտեղ քննության է առնվելու անմեղսունակության վիճակում քրեական օրենքով արգելված արարք կատարած անձին հարկադիր բուժման ուղարկելու հարցը»,- ասաց նա։
Արթուր Թորոսյանի պաշտպանը հավելեց, որ հարկադիր բուժման համար կոնկրետ ժամկետներ չկան։ «Դա կարող է տևել մի քանի ամսից մինչև մի քանի տարի»,- նշեց նա։
Հիշեցնենք, որ հունվարի 23-ին Արթուր Թորոսյանը ներխուժել էր «Էրեբունի պլազա» և կրակոցներ հնչեցրել։ Ավելի ուշ՝ ոստիկանապետի պաշտոնակատար Արման Սարգսյանը բանակցել էր նրա հետ և իր ծառայողական մեքենայով հեռացրել տարածքից։
Նելլի Մելքոնյան
