Երեկ արտառոց դեպք է տեղի ունեցել Գեղարդի վանական համալիրի տարածքում։ Ժամը 15.00-ի սահմաններում համալիրի տարածքում գտնվողները լսել են պայթյունի ձայներ հիշեցնող սարսափելի աղմուկ, որը տևել է մոտ կես րոպե։ Մինչ տարածքում գտնվող հատուկենտ այցելուները փորձել են հասկանալ, թե դա ինչ աղմուկ է՝ համալիրին հարող ժայռերից սկսվել է քարաթափում, ընդ որում՝ այնպիսի ուժգնության, որ տարածքում գտնվողները ահաբեկված փորձել են պատսպարվել վանքի ներսում։ Բարեբախտաբար՝ ժայռաբեկորները չեն հասել մինչև համալիրի տարածք, այլ ճանապարհին սահելով կանգ են առել, սակայն քարաթափումից առաջացած փոշու ամպը դեռ տևական ժամանակ պահպանվել է։
Համալիրի տարեց հսկիչը նշել է, որ տասնյակ տարիների ընթացքում այդպիսի ուժգնության քարաթափում չէր տեսել։
Ի դեպ, նշենք, որ այս օրերին՝ համաճարակով պայմանավորված, համալիրի դռները թեև բաց են, սակայն, կրոնական ծեսեր չեն իրականացվում։ Քարաթափման պահին տարածքում են եղել հատուկենտ այցելուներ։
Հավելենք, որ Գեղարդի վանական համալիրի տարածքում մինչ օրս առկա է դեռ 1975թ, քարաթափման հետևանքով պոկված ժայռաբեկորը, որի ընկնելու պահին տարածքում առկա են եղել տասնյակ հավատացյալներ, այն, սակայն, չի վնասել որևէ մեկին։ Ամենայն հայոց կաթողիկոս Վազգեն Ա-ի հրահանգով ժայռաբեկորը որոշվել է թողնել այնտեղ, որտեղ այն ընկել է։
Վարուժան Հայրապետյան
