Համակարգիչ ու ինտերնետ հասանելիություն. նվեր գյումրեցի անապահով դպրոցականներին՝ դասերը հեռավար անցկացնելու համար

ՀՀ տարածքում հայտարարված արտակարգ դրությամբ պայմանավորված՝ բոլոր ուսումնական հաստատություններն ուսումնական գործընթացը տեղափոխել են առցանց տիրույթ, դասերն ընթանում են հեռավար:

Շիրակի մարզի շատ անապահով ընտանիքների աշակերտներ, սակայն, դուրս են մնում կրթական այս գործընթացից՝  համապատասխան տեխնիկայի ու ինտերնետի բացակայության պատճառով: Պաշտոնական տվյալներով՝ Շիրակի մարզում 13.442 անապահով ընտանիք կա։

Նրանցից մեկն էլ Առաքելյանների ընտանիքն է։ Ընտանիքի մայրը՝ Լիլիթ Առաքելյանը, արդեն 8 տարի 3 անչափահաս երեխաների հետ ապրում է Գյումրիի ամենախոցելի՝ Բուլվարային թաղամասերից մեկում, մի բնակարանում, որտեղ դռներին փոխարինել են ծածկոցները, պատերի ու առաստաղի ճեղքերը փակում են  ստվարաթղթով:

Ընտանիքի հայրը լքել է նրանց, մայրն օրավարձով է աշխատում, հիմա գործազուրկ է: Երեխաները դպրոց են հաճախում՝ սովորում են 5-րդ ու 3-րդ դասարանում։ Այս օրերին, երբ ուսուցումն առցանց է, նրանք հայտնվել են անելանելի վիճակում. մոր հեռախոսով երեք դպրոցականները չեն կարողանում միաժամանակ դաս անել:

Այս հարցում Առաքելյաններին օգնության է շտապել Հայաստանի պետական տնտեսագիտական համալսարանի Գյումրու մասնաճյուղը. կորպորատիվ սոցիալական պատասխանատվության շրջանակում բուհն իր հոգաբարձության տակ գտնվող ընտանիքին համակարգիչ ու ինտերնետ հասանելիություն է տրամադրել։

«Ընտանիքի մասին տեղեկանալուց հետո որոշեցինք տնայց կատարել, արդյունքում, որպես մեր սոցիալական պատասխանատվություն, վերցնել ընտանիքի  հոգաբարձությունը։ Այսօր էլ անցնում ենք հեռավար տեսադասերի, և ցանկացանք, որ ընտանիքը նաև համակարգիչ ունենա, որ երեխաները կարողանան այդ դասերին ևս մասնակցել»,- Factor.am-ի հետ զրույցում ասաց ՀՊՏՀ Գյումրու մասնաճյուղի տնօրենի պաշտոնակատար Կարեն Պետրոսյանը:

Երեխաներն անմիջապես փորձարկեցին համակարգիչն ու մաթեմատիկայի հեռավար դասն անցկացրեցին։

Բուհի այս նախաձեռնության նպատակն է՝ կրթությունը հասանելի դարձնել բոլորի համար, զարգացնել հոգաբարձության ինստիտուտը։ Այն նաև կոչ է մարզում ու Գյումրիում գործունեություն ծավալող բոլոր կազմակերպություններին՝ օգնելու  բազմաթիվ անապահով ընտանիքների դպրոցականներին, որոնք այժմ զրկված են հեռավար ուսուցում ստանալու հնարավորությունից։

Էմմա Չոբանյան